Клиниката за дерматологија пренаменета во Ковид центар
Клиниката за дерматологија е повторно пренаменета во ковид центар. Болничките капацитети за хоспитализација на болни од ковид се 28 кревети, од кои 26 се веќе зафатени.
- Ова е втор пат како Клиниката за дерматологија ги става на располагање своите капацитети за помош на болните од Ковид-19. Просторот од болничкиот дел го ослободивме за ковид пациенти, а нашите болнички пациенти ги префрливме на Клиниката за ендокринологија, рече денеска во Утрински брифинг д-р Дејан Филиповиќ, од Клиниката за дерматологија.
Тој сепак нагласува дека делумната пренамена на болницата не влијае врз работењето со пациенти кои имаат потреба од специјалистички прегледи.
- И покрај пренамената на дел од клиниката, нашите амбуланти работат со пациенти кои имааат потреба од специјалисти по дерматологија. Нив ги прегледуваат повозрасните колеги, кои морам да кажам дека работат под постојан притисок поради преполовеноста на персоналот, додека ние помладите сме ангажирани во ковид центарот.
Тој вели дека на почетокот на пренамената на болницата им било најтешко да се навикнат на новите услови на работа.
- Тешко ни беше да бидеме анестезиолози и инфектолози, ние сме дерматолози. Не сме навикнати во нашата болница да умираат пациенти. Но, доктори сме, имаме положено Хипократова заклетва дека ќе помагаме и моравме да излеземе во пресрет. Сега веќе сме во одличен ритам, целокупниот тим од Клиниката за дерматологија одлично си ја извршува својата работа, вели д-р. Филиповиќ.
- Нашата Клиника подготвува труд кој ќе биде објавен меѓународно, а се однесува на опаѓањето на косата како последица на ковид вирусот. Нашите досегашни согледувања велат дека жените чувствуваат повеќе последици за разлика од мажите, но тоа ќе треба да го докажеме. Сепак, тоа е реверзибилен процес, тоа значи дека косата повторно се враќа, уверува нашиот соговорник.