Коцевска: Годинашниов фестивал „Прво па женско“ се фокусира на грижата за јавното добро

Деветтото издание на Фестивалот за феминистичка култура „Прво па женско“, во организација на Тиииит! Инк, ќе се одржи од 10 до 16 јуни на повеќе локации во Скопје. Годинава Фестивалот се фокусира и го преиспитува концептот на јавното добро, во контекст на светска пандемија, но и локално.

„Годинава, фестивалот за феминистичка култура и акција „Прво па женско“ ја отвара дискусијата за преиспитување на концептот на јавното, секако особено значаен во овој период кога ни се случува светската пандемија, но и во поглед на локалната состојба со тоа што ја проблематизира и ја става во фокусот идејата за достапност на она што се смета за јавно и заедничко. И кон кое, навистина, треба да градиме однос на грижа и зачувување кои што недостасуваат. Значи, ќе зборуваме за јавните простори, за пристапот до здравствени услуги, за културата како јавно добро кое никому не смее да биде ускратено и сите треба да имаат еднаков пристап до култура, тука би ја вброила и достапноста на услугите од страна на јавните институции кон граѓаните, потоа екофеминистичкиот поглед кон решавањето на оваа очајна состојба во која се наоѓа човештвото и планетата. Тоа се некои од точките врз кои се заснова годинешната програма на фестивалот“, вели за Утрински брифинг, Јана Коцевска од Тиииит!

Инк. Фестивалот „Прво па женско“, ќе почне во 19 часот, на платото пред МКЦ со ПичПрич слем на тема: Гинеколошки приказни, потоа следува промоција на албумот на Мартина Бараковска и концерт на „You“. Програмата ќе трае до 16 јуни со концерти, изложби, дискусии, филмски проекции во Музејот на современа уметност, а годинава има и младинска програма која се фокусира на заземање, или креирање на сопствен дискурс во етерот.