Коцевска: Менструацијата да престане да биде табу и да има бесплатни производи во училиштата
Студијата „Менструална правда: проценка на состојбите со менструалната сиромаштија и препораки за унапредување на политиките“, изработена од Здружението за промоција на женската активност „Тииииит! Инк“ и „Реактор – истражување во акција“ покажува дека една жена во текот на репродуктивниот период од својот живот троши осум месечни плати само за трошоци поврзани со менструални производи и лекарства за менструална болка. И уште еден загрижувачки податок: за 15 отсто од девојчиња менструацијата е луксуз бидејќи не можат да купат влошки.
„Истражувањето е направено на три нивоа, беше објавена онлајн анкета за полнолети граѓанки и граѓани, бидејќи сакавме да измериме ставови, бидејќи ова истражување е сеопфатно и не ги мери само искуствата, туку сакавме да дознаеме како се перцепира менструацијата, дали е табу или не е и затоа ја отворивме анкетата за сите граѓани. На овој прашалник одговорија над 2600 испитаници, потоа имавме истражување во средните училишта со дозвола на Министерството за образование и Бирото за развој на образование, од таму добивме одговори од вкупно 307 ученички и потоа направивме анализа на трошоци за да видиме колку една жена мора да одвои средства за менструални производи и колку би чинело доколку тие трошоци се покријат од буџетот. Ние пресметавме дека тоа би чинело 0, 08 отсто од годишниот буџет на државата. Всушност, ние се инспириавме од Шкотска, која во 2018 година започна со едно исто вакво истражување за да во јануари 2020 година донесе закон кој ги обврзува институциите да овозможат бесплатни производи за менструална хигиена. Ние дојдовми до загрижувачки резултатати кои се добиени од оние што имаат пристап до компјутер, а може да замислите каква е состојбата кај оние што немаат компјутер и кои не дознале за ова истражување“, вели за Утрински брифинг, Јана Коцевска од здружението „Тииииит! Инк“.
Таа нагласи дека освен тоа што здруженијата за родова еднаквост бараат хигиенските менструални производи да бидат поевтини, со намалување на данокот од 18 на 5 отсто или бесплатни, треба да се престане со табуизирањето на менструацијата.
„Имавме одговори дека во руралните средини кога девојките купуваат влошки, тие се виткаат во весник да не се гледаат, бидејќи е тоа нешто срамно“, рече Коцевска.