Лешоска: Дури 72 отсто од жените кај нас го носат товарот на неплатената работа

На дневна основа, во споредба со мажите, жените трошат 18 пати повеќе време за миење садови, 12 пати повеќе време за чистење, 9 пати повеќе време за готвење и 3 пати повеќе време за грижа околу децата – ова се дел од резлултатите од новата студија на Реактор – истражување во акција, насловена „Мажите и грижата: Грижлив маскулинитет во Северна Македонија“ и кое меѓу другото ги разгледува и родовите јазови во платената и неплатената работа.

„Во суштина истражувањето е обид да се покажат нееднаквостите во доменот на грижа, колку мажите и жените имаат еднакви можности да се вклучат во домашните активности поврзани со грижата за децата и домот, меѓутоа тоа се рефлектира и во пристапот до еднаквите можности за пристап до платена работа. Поимот ‘грижлив маскулинитет’ да се воведе во јавноста еден нов концепт за машкоста наспрема онаа нормативна маскулиност, која за жал, наметнува очекувања за доминантност и моќ и која ја исклучува грижата како споделена обврска во нашето општество. Ова е начин за редефинирање на улогите, патријахалните норми кои се подеднакво ограничувачки и за мажите и за жените“, вели за Утрински брфинг Васка Лешоска, програмска координаторка во Реактор.

Според наодите од ова истражување жените во Република Северна Македонија извршуваат 72,5 отсто од вкупната неплатена работа поврзана со грижа.

„ Жените повеќе се занимаваат со грижата за децата и за повозрасните, со домашните работи: перење, чистење, готвење, и доколку времето поминато во тие активности го вреднувате како работа што и е, ќе видите дека во просек, во еден работен ден, за мажите 71 отсто од времето е посветено на платена работа и кариера, што значи дека 29 отсто останува за неплатениот труд, додека кај жените е сосема поинаква дистрибуцијата на трудот и кај нив 62 проценти од времето посветено на работа во денот, всушност не е платено, не е валоризирано ан традиционалниот пазар на труд и е посветено на домашни обврски, додека 38 отсто од времето е посветено на платена работа и кариера“, додава Лешоска.

Истражувањето нагласува дека државните и приватните политики треба да се насочат кон создавање работни средини кои промовираат и поддржуваат иницијативи за рамнотежа помеѓу работата и животот, како што се градинки во рамки на работните простории, флексибилни работни аранжмани, двојно родителско отсуство, безбеден, достапен јавен превоз.