? ?Маричиќ: Опозицијата треба да се стреми кон национална стратегија за отворените прашања со Бугарија, а не да брка ситни политички поени
Бугарската декларација, која неодамна се актуелизираше во медиумите, е усвоена во октомври минатата година и не претставува евентуална препрека во натамошниот процес на итегрирањето на Северна Македонија во ЕУ, вели Бојан Маричиќ, советник за надворешна политика во Владата.
Маричиќ во Утрински брифинг објасни дека во таа декларација се наведени максималните очекувања на Бугарија, а дел од нив немаат основа за такво нешто.
„Декларација на бугарското Собрание е усвоена во октомври минатата година и во неа се наведени максималистичките очекувања на Бугарија за разрешувања на прашањата поврзани со Договорот за добрососедство и пријателство. Дел од нив се инкорпорирани во договорот, имаат свое место, дел одат надвор од договорот. Таа изјава нема правна сила. Таа би била прикачена како изјава која ја определува позицијата на Бугарија во однос на некои прашања“, вели Маричиќ.
Тој потенцира дека Бугарија веќе го даде својот глас за почеток на преговорите на ЕУ со Северна Македонија, а овие прашања би требало да се решат во текот на преговорите.
„Нас не става во поволна позиција тоа што го имаме потпишано Договорот за добрососедство и пријателство, кој пак е брана од своеволие на било која страна и има доволно механизми, односно претставува добра основа за решавање на овие прашања. ЕУ ги третира како билатерални теми. За ЕУ е важно да ги одржуваме добрососедските односи“, изјави државниот советник во Утрински брифинг.
Коментирајќи ги ставовите на опозицијата пак, Маричиќ смета дека таа се поставува контрашки кон се што значи интеграција во ЕУ и НАТО.
„Наместо да изградиме национална стратегија за овие прашања кои ќе се решаваат и во идните години во рамките на преговорите, ние сведочевме желба за брзо собирање политички поени, а без основа. Тие како политичка партија ќе се најдат во конфронтација со држава членка на ЕУ, со соседна Бугарија. Ние сме пред се за дијалог. Затоа и е потпишан Дговорот со Бугарија, за да може да градиме пријателство и решавање проблеми во тие рамки. Очекувам опозицијата да ја прекине таа практика“, дополни Маричиќ.
Декларацијата е излезена во октомври во предизборен амбиент, а смета дека се актуелизира сега бидејќи бугарскиот претседател и Владата не секогаш имаат исти ставови, додека бугарската опозиција пак, врши определен притисок за овие прашања да бидат повисоко на агендата.
„Мислам дека ова е своевиден компромис, отворање на простор за да испливаат дел од оние радикални ставови кои во минатото немаа многу можност да бидат во прв план и самото тоа овозможи да се изгради пријателството. Ние не сметаме дека оваа декларација е погодна. Има делови за кои апсолутно не може да разговараме, како прашање дали имало или немало македонски јазик и слични радикални ставови. Непристојно е и не може да помине на ниво на ЕУ, негирање на една нација. Бугарските радикали имаат неразбирливи ставови. Но околу разрешување на историските прашања, тоа ќе биде оставено на историчарите со поддршка на политичарите. За нас е важно да не се влезе во круг на блокади, но не сметаме дека Бугарија ќе влезе во таков ритам“, изјави државниот советник за надворешни работи.
БОРБАТА СО КОВИД 19 СО ПОДДРШКА НА ЕУ
Во однос на справувањето со Ковид 19 и европската поддршка, Маричиќ во Утрински брифинг ги сподели некои, од како што вели, брзите мерки пред најавата за европска помош.
„Веднаш овозможивме границите да се отворени за најважните продукти да може да се врши транспорт. Потоа се зголеми набавката на медицинска опрема, а од ЕУ добивме неповратна помош од 66 милиони евра и 160 милиони поволен заем одобрен за ликвидноста на компаниите и Буџетот од ЕУ.
Ова значи дека Западен Балкан е сериозено сметан за дел од ЕУ и политичката порака што Загребскиот самит на 6.мај се одржува во целосен формат, со сите лидери на државите членки е доволна порака дека Западен Балкан не е заборавен“, вели тој.
Иако оригиналниот план од Загребскиот самит беше да понуди план за економски развој за вложување на ЕУ во Западен Балкан, а воедно и да се потврди дека бргу ќе биде преговарачката рамка за Македонија и Албанија, сега според најавите, самитот ќе се прилагоди да економскиот план повеќе биде насочен кон борбата со пандемијата со Ковид 19.