Меѓаши: Доколку би се казнувале прекршителите, никој не би ги користел децата во политичка кампања

Во 1991 година е донесена Декларација за заштита на децата од злоупотреба во политички кампањи, истата е ратификувана во 1993 година. Сепак, се уште се злоупотребуваат децата во политички кампањи. Ова за Утрински брифинг го истакна Јорданка Черепналкова- Трајкоска од Првата детска амбасада во светот-Меѓаши.

-Иако со изборен законик се забранува злоупотребата на децата во предизборни кампањи, се уште има случаи кои потврдуваат повредувања на правата на децата. До нас стигна информација за манипулација на деца во политичка кампања, и затоа уште минатата недела апелиравме до политичките партии да внимаваат на правата на децата. Тие не се ниту инструмент ниту декор во политичка партија, објаснува Трајкоска.

Таа потсетува дека никој досега не ги консултирал децата кога требало да се донесат одлуки кои се однесуваат на нив.

– На децата треба да се мисли 365 дена во годината, како да се подобрат нивните услови за обеазование, социјални услуги, се што се однесува на нивниот развој. Одговорен политичар ќе го земе во предвид мислењето на децата за работите кои нив ги засегаат, во спротивно станува збор за манипулација, објаснува Черепналкова Трајкоска.

Таа вели дека треба да биде прашано дали сака да учествува во одредена кампања, а при тоа политичарот треба да биде сигурен дека детето ја разбрало кампањата и политиката на одредена политичка партија.

– Во самиот Изборен законик има став од членот 76 кој забранува учество на деца во политички кампањи, но сепак и покрај тоа, досега ниту една партија не била казнета за непочитување на оваа забрана. Можеби тука треба да ја бараме причината за непочитување на забраната за злоупотреба на децата во политички кампањи, вели Черепналкова Трајкоска.