НВО: Сексуалното образование нема да ги учи децата како да практикуваат секст, туку да се заштитат
Сексуалното образование е исклучително важно да се воведе во училиштата и истото опфаќа седум компоненти, род, сексуално и репродуктивно здравје, насилство, тело и слика за телото, врски и односи, граѓански аспекти и различност. Учејќи ги овие компоненти, младите ќе можат да препознаат насилство, да не го практикуваат и да не го дозволуваат, рече денеска во Утрински брифинг Ангела Александровска од ХЕРА.
-Сексуалното образование ги учи децата како да препознаат, да реагираат и каде да пријават сексуално насилство. Исто така на часовите по сексуално образование ќе се учи што е тоа согласност и зошто е важна таа согласност, како и дека еднаш дадена согласност не важи засекогаш. Децата ќе учат и за превенција од сексуално преносливи болести и инфекции. Сеопфатно сексуално образование не се однесува само на биолошкиот дел од сексуалноста, тоа е процес во кој младите ќе научат како да создадат одредени ставови, вештини знаења кои ќе им помогнат во секој аспект од животот, објаснува Александровска. Драгана Дрндаревска од Коалиција Маргини нагласува дека станува збор за пилот проект, во кој ќе бидат опфатени училишта во Скопје и Тетово и тоа од деветто одделение.
-Според мене едно одделение не е доволно, но засега сме во фаза на пилотирање на проектот, со цел да видиме какви ќе бидат реакциите на наставниците, родителите и учениците. Засега течат обуките на наставниците кои треба да ги држат предавањата. Агенциите на обединетите нации бараат од нас да го импементираме сексуалното образование, односно образование кое ќе го зајакне сексуалното и репродуктивното здравје на младите, а со тоа и да се избегне несакана бременост, врснчкото насилство, сексуалното насилство и родовите нееднаквости помеѓу младите, вели Дрндаревска.
Во однос на досегашното образование во рамки на кое на часовите по биологија се изучува репродуктивното здравје, таа вели дека сите анализи на здруженијата на граѓани и на МТСП покажуваат дека сегашното образование е многу застарено и со него со промовира родова нееднаквост и шовинизам.