„Не постои стерилност, туку неплодност која може медицински да се третира“

Доколку ниту еден од потенцијалните родители нема здравствен проблем, при нормален сексуален однос, една година е доволна за забременување. Доколку по една година, но и ако постојат претходни фактори кои алудираат на некаков проблем, здравствените испитувања испитувања треба да започнат веднаш.

Ова го напоемна доктор Глигор Димитров во „Утрински брифинг“, потенцирајќи дека одредени прашања на докторот специјалист се клучни за откривање на проблемот и негово понатамошно третирање.

„Во последните неколку години, од аспект на стерилитет, свеста за тестирања е повисока. Се повеќе пациентите сфаќаат дека треба порано да се оди на доктор и да се направат и општи прегледи“, вели Димитров.

Тој нагласува дека медицината повеќе не препознава „стерилитет“, туку неплодност која може да се третира.

„Важно е да се направат комплетни испитувања пред да се премине на биомедицински потпомогнато испитување. Тоа може да се направи еден до два месеци и да се имаат комплетни испитувања за да се види кон каква метода на помагање треба да се оди“, изјави Димитров.

Докторот од приватната клиника Ре-Медика, напоменува сепак дека државата мора да помогне при помогнато забременување, бидејќи приватното „ин-витро“ е прилично терет за потенцијалните родители, со оглед на тоа што основните трошоци достигнуваат и до 3-4 илјади евра.