Николчо Илијев: Изградив што не било изградено 30 години и затоа се кандидирам повторно

Кочани е град со околу 38.000 граѓани иако голем број се иселуваат од различни причини. Во последниот мандат градоначалникот беше Николчо Илијев поддржан од СДСМ, но претходно од 2009 до 2017 година градоначалникот Ратко Димитровски беше од редовите на ВМРО-ДПМНЕ, а сегашниот кандидат Папазов во тоа време беше директор на Комуналното претпријатие.

Кусата анкета со граѓаните на Кочани што ја направи колегата Љубиша Николовски покажува дека граѓаните се задоволни од работата на досегашниот градоначалник и кандидат за втор мандат Николчо Илијев.

-Ме радува што моите сограѓани се задоволни од мојата работа. Оти локалната самоуправа служи да ги опслужува потребите на граѓанството. Минатите избори со огромна бројка ми беше дадена поддршка. Но и очекувањата на граѓаните беа огромни, а со тоа и нашите обврски како локална самоуправа, вели Илијев за Утрински брифинг.

Илијев вели дека на почетокот на мандатот направиле стратегија како ќе се движи работата на локалната самоуправа во Кочани. Тој вели дека прво била донесена одлука за транспарентно работење и рамномерен локален развој – и во градот и во населените места. Илијев вели дека токму таа политика ги дава првите резултати, но повеќе ќе се види на подолг рок оти преку ноќ не серешава ништо.

-Инвестиравме во секое населено место. Нема дел од градот каде немаме направено нешто. Нема сфера каде немаме инвестирано максимум што може. Има проекти што ги завршуваме. Но најголем проблем е патната инфраструктура, одводот на отпадни води и водоводната мрежа, вели Илијев за Утрински брифинг.

-Не е мое да судам што било правено порано. Но имавме голем притисок да направиме патна структура и канализациска мрежа, а платиле комуналии пред 40 години. Затоа градевме ифраструктура од над 60 улици, 50 км асфалтирани улици, над 9 милиони евра вложени во инфраструктура. Тоа го гледаат граѓаните во секојдневното живеење и им се подобрува стандардот на живеење, вели Илијев.

Општините се главно задолжени па прашањето што се наметнува е од каде општина Кочани добива пари или исто се соочи со недостиг на средства.

-Секако дека тоа е проблем, но ако се решите за домаќинско работење со тие средства се стига до резултат. Ја стабилизирав општината, да си ги подмирува обврските. На јавните набавки слободно се пријавуваа фирми па така со исти средства реализиравме повеќе оти цените паѓаа. Најголем дел од буџетот треба да оди и одеше во капитални инвестиции кои во Кочани се поголеми од тековните трошоци. Тоа покажува дека сме решени да работиме за подобрување на животот на граѓаните. Ние градиме четири години, а тоа што го направивме не било направено 30 години и затоа се кандидидирам повторно, вели градоначалникот и кандидат за втор мандат Николчо Илијев.