Оперативниот план за вработување на АВРМ изнесува 1.5 милијарди денари и со него ќе бидат опфатени 10.279 лица
Директорот на Агенцијата за вработување на Македонија, Абдуш Демири деенска во Утрински брифинг го објасни Оперативниот план за вработување, но нагласи и дека значително е зголемен бројот на невработени.
– Со сигурност можеме да констатираме дека кризата предизвикана од Ковид-19 влијаеше на покачување на бројот на невработени лица. Согласно податоците на АВРМ, до 28 февруари 2021 година евидентирани се 18.226 за кои одјавата од социјално осигурување е регистриран после 11 март 2020 година, односно во периодот откако почнта пандемијата од Ковид-19. Сепак, должни сме да објасниме дека има и други причини за зголемување на бројот на невработени. Имено, за да се оствари правото на паричен надоместок по основ на невработеност мора корисникот да биде евидентиран како активен барател на работа. Истото се однесува и на остварувањето на социјална помош. Со четвртиот пакет мерки им се додели парична помош на пасивните баратели на работа, што доведе до зголемување на бројот на невработени лица, рече Демири.
Тој нагласи дека Оперативниот план вработување ќе опфати 10.279 лица. -Агенцијата за вработување е имплементатор на Оперативниот план за вработување и е целосно подготвена за негова реализација. Истиот изнесува 1.5 милијарди денари и со него ќе бидат опфатени 10.279 лица, што ќе овозможи создавање на нови работни места и зголемување на невработливоста на невработените лица. Ова се однесува посебно на младите, долгорочно невработените, корисниците на помош за социјална заштита како и на оние чиј работен однос е евидентиран за време на кризата предизвикана од пандемијата. При имплементација на програмите и мерките на вработување како и услугите на пазарот на трудот ќе се почитуваат следните принципи: справување со негативните ефекти и последици на пазарот на труд предизвикани од пандемијата, принципот на инклузивност за сите опшествени категории во приватниот сектор согласно принципите на правична и адекватна застапеност на етничка, полова и религиозна застапеност.
Ќе поттикнеме и рамномерен регионален развој во согласност со податоците од Бирото за регионален развој и степеност на развиеност на планските региони во државата. Тоа ќе значи дека сите невработени лица ќе можат да учествуваат и да ги користат мерките, информира Демири и нагласува дека програмата самовработување секоја година е една од најбараните програми и една од најатрактивните мерки.
– Тоа беше причина оваа година да го зголемиме опфатот и да обезбедиме поддршка на 1.762 лица кои сакаат да отворат сопствен бизнис и да станат претприемачи. Висината на финансиската поддршка изнесува 307.500 денари или 615.000 доколку се основа правен субјект од два содружника кои ќе ги исполнуваат условите. Станува збор за неповратни средства, рече Демири. Невработените лица кои доцнат со законската обврска за пријавување во Агенцијата за вработување ќе бидат избришани од списокот на Агенцијата доколку не се пријават до 19 март.
– Остануваат уште три дена, затоа апелирам до сите невработени лица кои ги надминале роковите за пријава во евиденцијата на АВРМ да дојдат во центрите за вработување каде се евидентирани и да ја регулираат својата обврска. Согласно Законот за вработување и осигурување во случај на невработеност лицето кое е евидентирано како активен барател на работа е должно да се јавува на пријава секои 30 дена, додека пасивните баратели на работа на секои шест месеци. Во спротивно АВРМ ќе биде приморана да ги избрише од списокот на евиденција а со тоа ќе ги изгубат и правата кои ги имаат врз основ на тој статус. Исто така апелиран сите кои ќе дојдат во Агенцијата да ги почитуваат мерките за заштита од Ковид-19, со тоа што ќе носат заштитни маски, ќе држат растојание и ќе прават дезинфекција.