Отсега обука за прва помош само во Црвен крст

Од први февруари обуката за Прва помош која е задолжителен дел од полагањето за возачка дозвола, ќе се одвива единствено во просториите на Црвениот крст на Град Скопје, за разлика од досега кога сертификат за положена прва помош се добиваше и од останати организации. Секретарот на Црвен Крст на Град Скопје, Сузана Тунева Пауновска за Утрински брифинг вели дека ова ќе биде позитивна промена и дека идејата не е да се направи монопол туку да се добие квалитет, а полагачите при стекнување со сертификатот, да имаат основни познавања од прва помош.

-Првата помош е многу важен сегмент и благодарни сме што МВР и Министерството за здравство ги препознаа нашите повици дека мораме да имаме единствен и унифициран пристап во делот на обуката за новите возачи. На први февруари ќе се отвори центарот за обука по прва помош но ние веќе почнавме да работиме по тој систем во веќе постоечките капацитети на Црвениот крст.Сите општински организации на Црвен крст ќе се соединат и граѓаните од сите населби ќе следат обука во „Даре Џамбаз“.

Додека кандидатите од останатите градови обуката ќе ја следат во градовите каде што живеат, во простор кој Црвениот крст ќе го определи за таа намена, информира Сузана тунева Пауновска. Цената за полагање на прва помош ќе биде унифицирана, и ќе изнесува 1.500 денари.