Пандемијата ги одложи културните настани во социјалниот центар „Дуња“

Единствениот социјалниот центар во Македонија „Дуња“ кој постои од 2016 година, поради глобалната пандемија предизвикана од коронавирусот, ги одложи сите културни настани. Џејлан Велиу, која е дел од колективот на „Дуња“ денеска во Утрински брифинг нагласи дека сите поетски читања, театарски претстави и концерти се одложени и ќе почекаат, како што вели таа, подобри времиња. Затоа, од центар за дружење, „Дуња“ го претвориле во место соодветно за собирање донации.

– Во рамки на нашите можности одлучивме да им помогнеме на лицата кои имаат потреба, бидејќи сфативме дека откако започна пандемијата, се зголеми сиромаштијата.Во 2020 година организиравме пет хуманитарни акции и помогнавме на околу сто семејства со храна, облека, училишен прибор и средства за хигиена. Иако првичната намена на социјалниот центар „Дуња“ е социјализација на луѓето, надвор од меинстрим социјализацијата, каде што треба да се негуваат различни вредности, како емпатија, солидарност, борба за промена на општеството, се преоринтиравме на хуманите вредности, рече Велиу. Се почнало на почетокот на 2020 кога бил организиран антиконзумеристички настан за размена на облека и книги, но на настанот се појавиле голем број граѓани кои побарале хуманитарна помош.

-Во 2017 година тука, во „Дуња“ две недели престојуваа десет бездомни лица, а уште дваесетина доаѓаат за да земат храна. На таков чекор се одлучивме бидејќи истата зима две бездомни лица починаа под отворено небо. За да успемее да ги реализираме хуманитарните активности добиваме помош во форма на донации, нагласи Велиу.