Папиќ Манчева: Репродуктивната слобода на жените во Македонија е драстично унапредена – имаме еден од полибералните Закони во Европа
Жените во Полска се научени дека масовно и брзо мора да се мобилизираат за да барем ги одложат рестрикциите на репродуктивните права и на правото на абортус што сакаше да ги воведе полската влада. Ова сценарио се повторува на неколку години со поддршка и на црквата која е прилично влијателна во Полска. „Вакви обиди да се ограничи правото на абортус има има и во многу други земји и за жал многу од нив ја злоупотребија пандемиската криза токму за овие цели. Такви примери има и во Хрватска, Италија Литванија, Словачка, Малта.
Кај нас, благодарение законот за репродуктивните права, можеме да кажеме дека репродуктивната слобода на жените во Македонија е драстично унапредена. Платформата за родова еднаквост беше вклучена во донесувањето на законот, па може да се каже дека е еден од полибералните во Европа. Со него се елиминира задолжителното пристрасно советување, се елиминираше задолжителното тридневно чекање што значи дека секоја бремена жена што ќе ја побара оваа здравствена услуга треба да ја добие навреме, без одложување, а се воведе и опцијата абортус на барање до 22 – та недела на бременоста и многу е важно што се укина условот за приложување на задолжителна документација од полиција, јавно обвинителство или центар за социјална работа доколку причината за абортус е сексуално насилство или промена на социјалните околности.
Се’ уште нема податоци како се спроведува овој закон, но она што го имаме како податок од Институтот за јавно здравјее дека во 2019 година се направени околу 4000 абортуси што е незначителен пораст во однос на претходната година“, вели за Утрински брифинг, Андријана Папиќ Манчева од „Хера“. Таа нагласи дека законот го овозможува методот на медикамнетозен абортус, како подеднакво безбеден метод на абортус кој дава позитивни резултати во повеќе европски држави, особено во услови на здравствената криза предизвикана од пандемијата со Ковид-19. Кај нас и покрај тоа што е овозможена од законот се’ уште не е воведена оваа метода заради тоа што уште не се увезени лековите со кои се изведува медикаментозниот абортус.
Папиќ Манчева рече дека клиничкиот протокол е во крајна фаза и ќе може да го спроведуваат здравствените работници и гинеколозите во примарната здравствена заштита. Активистките од Платформата за родова еднаквост, денеска протестираа против рестрикциите на репродуктивните права на жените пред полската амбасада во Скопје.