Продолжува врнежливото време – од четврток пораст на температурите – Славчо со детална анализа

Денеска нашата територија ќе се наоѓа под влијание на влажна и на нестабилна воздушна маса која на повеќе места ќе услови повремени врнежи од дожд. Локално ќе биде нестабилно со пороеон дожд, грмежи, засилен ветер, електрични празнења и услови за појава на град.

Локално врнежите ќе бидат исто така ПОИНТЕНЗИВНИ (над 25 л/м2). Ќе дува слаб до умерен ветер од северен правец, истиот особено долж повардарието повремено ќе засилува. Максималните дневни температури на воздухот ќе се искачуваат во интервалот од 20 до 28 степени.

И во Скопје и околината се очекуваат повремени врнежи од дожд, има услови и за нестабилност проследена со грмежи, особено попладне. Ќе дува слаб до умерен ветер од северозападен правец кој повремено ќе засилува. Максималната дневна температура ќе се искачи до околу 25 степени.

Потоа во следните денови во претпладневните часови ќе има повеќе сончеви периоди, додека попладне ќе има услови за изолирана појава на нестабилност проследена со пороен дожд, грмежи и засилување на ветерот. Температурите на воздухот, од четврток па натаму поради продор на топол воздух од југ ќе бележат тенденција на пораст.