Проект за бесплатни едукации за дигитален маркетинг за жени од ранливи категории
Жените и девојките до 29 годишна воздраст кои спаѓаат во категоријата ризик, односно се невработени, самохрани мајки или имаат здравствени проблеми, имаат можност да учествуваат во проектот кој го организира едукативниот и развоен центар Сивус. Станува збор за стипендирање на четиримесечна обука, која ќе им отвори нови можности за вработување на оваа категорија учесници во проектот. Директорката на Сивус, Весна Иваноска денеска во Утрински брифинг нагласи дека предност ќе им се даде на жените од внатрешноста на Македонија.
- Наша претпоставка дека жените кои живеат надвор од Скопје имаат помалку можности за овој тип на доедукација или прекфалификација. Овој проект има за цел јакнење на дигиталните вештини, односно дигиталниот маркетинг. Се надеваме дека ќе успееме на тој начин да придонесеме кон професионално и економско јакнење на жените, вели Иваноска.
Програмата за дигитален маркетинг ќе трае четири месеци и покрива основни области на маркетингот.
Директорката на Сивус вели дека не се потребни претходни познавања на областа, но поради големиот интерес ќе бидат направени разговори со кандидатките по што ќе следува процес на селекција.
- Станува збор за субвенционирана програма што значи дека кандидатките ќе треба да доплатат 20 проценти од вкупната сума или околу 270 евра, сума која ќе може да се плати до крајот на 2022 година. Програмата е внимателно дизајнирана и нашите проценки се дека со посветено следење на истата периодот од четири месеци е доволен за да се стекнат нови вештини. Програмата ќе се следи онлајн, додава Иваноска.
Повикот може да се најде на Фејсбук страната на Сивус и истиот е отворен до 13 декември. Проектот е поддржан од Шведската агенција за меѓународна соработка и развој.