Проф. д-р Јовановиќ: Ударот од кризата ќе го почувствуваме во 2023 и ќе трае неколку години

-Наредната недела ќе го објавиме најновиот извештај за економските состојби во источна Европа. Извештајот е скоро готов, но официјалното претставување го поместивме за после празниците. Генералната оценка е иста како и кај сите други институции кои што веќе излегоа со оценките, а тоа е дека економската активност ќе биде побавна од она што се очекуваше претходно, односно растот на БДП-то во било која земја ќе биде пониско од она што се очекуваше претходно, додека инфлацијата ќе биде повисока, вели за Утрински брифинг проф. д-р Бранимир Јовановиќ од Виенскиот институт за меѓународни економски студии.

Според Јовановиќ оценките за земјите од источна Европа се дека економската активност ќе забави, односно растот на БДП-то ќе биде понизок, односно помеѓу еден и два проценти поени од она што се очекуваше пред три месеци, додека инфлацијата ќе биде повисока за околу пет процентни поени.

-Конкретно за Македонија, во јануари проектиравме дека растот на БДП-то ќе биде 3.5%, а сега проекцијата ќе биде, веројатно, околу 2.5%, што е видно забавување, но не е нешто драстично.

-Инфлацијата се очекуваше претходно да биде околу 3 до 4%, сега поради новите проекции ќе биде околу 8 до 9%, со тоа што сите овие проекции се однесуваат на сценариото во коешто нема ескалација на војна, вели проф. д-р Јовановиќ.

Според него главниот фактор што ќе ги движи сите динамики во наредниот период е војната во Украина.

-Ако дојде до ескалација на конфликтот и зголемување на зголемување на санкциите од страна на ЕУ, поконкретно ембарго на рускиот гас, тогаш веќе може да се очекува рецесија во повеќето источно Европски земји, додава проф. д-р Јовановиќ.

Целиот разговор погледнете го во видеото