Проф. Ѓоргиевски: Станарите можат да се организираат и да направат од зградите активни извори на енергија

Струја ќе има, но нема повеќе да биде евтина и треба да сме свесни за тој факт. Затоа треба да се размислува за алтернативни начини за производство на струја кои би биле исплатливи во однос на инвестиција и произведена енергија. Дали фотоволтаиците се добра алтернатива за обезбедување електрична енергија за домаќинствата во Утрински брифинг разговаравме со проф. Владимир Ѓоргиевски од ФЕИТ.

-Обновливите извори на енергија веќе не се алтернативни извори на енергија. Тие сега се поевтини од сѐ што порано било сметано за главни извори на енергија. Кога станува збор за домаќинствата, еден од начините да се заштитат од ценовни шокови е да генерираат алтернативни извори на енергија, вели проф. Ѓоргиевски.

Кога се зборува за интеграција на алтернативни извори на енергија во енергетскиот систем тоа е поврзано со развивањето на јаглеродно неутрални производствени капацитети, а тука спаѓаат и фотоволтаиците. Има и рокови до кои производството треба да се адаптира и да се усогласи со борбата против климатските промени.

-Фотоволтаични системи и генератори можат да се инсталираат на згради. Ние работевме проект за изнаоѓање решенија за интеграција на овие генератори кои можат да направат проблем на енергетската мрежа. Со тек на време дојдовме до правилник со кој се регулира и дозволува инсталирање фотоволтаични генератори во домаќинствата со тоа што вишокот струја се враќа во системот и потоа се врши комензација. Но, правилникот треба да се доработи, вели Ѓоргиевски.

Тој додава дека преку имплементација на мерките за енергетска ефикасност се намалува потрошувачката на струја. Просечно домаќинство користи 4000-5000 киловати годишно, а еден фотоволтаик произведува 1200 киловатчасови. Но, во времето кога генераторот произведува струја, потрошувачката на домаќинството е најмала, па оттука би требало да се најде начин на компензација, вели Ѓоргиевски.

Ѓоргиевски додава дека добро решение е формирање на енергетски заедници на жители во кои би се вршела размена на електрична енергија. Тоа е идеално решение за колективните станбени објекти, но може да се примени на цела улица или населба. На тој начин зградите стануваат активни извори на енергија, појаснува тој.

-Прашањето е што ќе се случи ако сите еднакво инвестираат а различно трошат. Очекуваме преку соодветни правила да се регулира или компензира распределбата на енергијата. За тоа има различни начини, кои не се правични но пак се исплатливи, вели проф. Ѓоргиевски за Утрински брифинг.