Разговор со Ана Алексовска која доби награда на „Кустендорф“ а сега подготвува документарец за студентските протести

Документарниот краткометражен филм „Господата од Современа“ на режисерката Ана Алексовска, ја доби наградата „Бронзено јајце“ на Интернационалниот филмски и музички фестивал „Кустендорф“. Тоа е фестивалот на Емир Кустурица, кој годинава се одржуваше онлајн. Филмот веќе освои неколку меѓународни награди, меѓу кои и главната на Московскиот фестивал на краткометражни филмови.

„Освен овие награди, ја добивме и главната награда на фестивалот во Љубљана ФЕК, на Кустендорф се пријавивме затоа што долги години го знаеме фестивалот, мислам дека секој студент од овој регион го посетил барем еднаш, таму доаѓаат режисери коишто мене и на моите колеги, додека студиравме, ни беа најголемите идоли како Ким Ки Дук, Џони Деп, Никита Михалков итн. Кустендорф ги промовира авторските и независните филмови и затоа самата апликација за фестивалот е бесплатна, за разлика од другите фестивали кадешто само за да го прегледаат филмот се плаќаат високи суми.

Што се однесува до темата на „Господата од Современа“ имавме силен порив да ја прикажеме другата страна на приказната, бидејќи мислам дека во целото наше општество имаме проблем со разбирање на различното, недостаток на емпатија. Во фокусот на филмот се група повозрасни луѓе кои доаѓаат буквално на секоја изложба и често бидуваат обвинувани дека тоа го прават само заради храната и пијалоците што се служат на отворањата на изложбите. Но всушност има една друга, посуштинска димензија а тоа е чувството дека се прифатени и дека припаѓаат некаде, што многу говори и за нашето општество“, вели за Утрински брифинг режисерката Ана Алексовска.

Изминатата година таа ја искористила за подготовки на својот следен документарен филм кој ќе се занимава со некогашните студенти, членови на Студентскиот пленум кој пред неколку години ги иницираа масовните студентски протести во државата. „Ме интересира од сегашна гледна точка каква е нивната идеолошка, духовна поставеност во моментов. Кога разговарав со некои од нив, кажаа некои реченици што се’ уште ми одзвонуваат во глава. Повторно ги прегледав снимките, видов колку многу работи се променети од тој период и посакав да го истражам тој развој“, додаде Алексовска.