Разговор со Мицко Дамњановски, новиот директор на Операта

Мицко Дамњановски е новиот уметнички директор на Операта при Националната опера и балет (НОБ) кој вели дека неговиот личен предизвик е да допринесе за подобрување на целокупната работа на институцијата.

„Во операта сум од 1999 година, а вработен сум од 2007 година ги знам работите одвнатре и ја прифатив позицијата со надеж дека ќе оставам свој печат во Операта. Пандемиската година влијаеше многу врз нашето работење, ние, како колектив се трудиме да ја одржуваме програмата на едно ниво кое нема да биде во спротивност зо здравствените протоколи, се трудиме да работиме со публика. На ансамблите навистина им е многу тешко бидејќи и оркестарот и хорот и балетот треба да работат тимски, тоа е групна работа а во овие услови не смее да има никаков близок контакт, не смеат ниту да седат еден до друг, а не пак да има драма, односно сценско дејствие и тоа ни задава големи проблеми.

Се трудиме преку интересна програма на гала концерти на преработени опери, односно во концертни изведби да го задржиме вниманието на публиката, меѓутоа в овој период е извноредно тешко да се работи и ќе почекаме да заврши сето ова за да се вратиме на сцената. Може и ќе мора да се работи онлајн, но чувството на присуство на публиката во сала ништо не може да го замени. Во овие услови не можеме да планираме за три, шест или повеќе месеци однапред, но секако сакам некои претстави да се вратат на репертоарот, но се ближи мај, а ние не знаеме дали ќе ни се одржат Мајските оперски вечери, ние се подготвуваме но тоа ќе зависи од целокупната здравствена ситуација“, рече за Утрински брифинг Мицко Дамњановски, директор на Националната опера.

Тој најави дека на 12 февруари ќе се одржи концертна изведба на операта „Кавалерија рустикана“.