Рамадани: Задирањето во идентитетот и јазикот е неевропски и ние ќе кажеме „не“ ако има таков предлог за решение на спорот со Бугарија

На Преспа форумот што овие два дена се одржува во Охрид се отвораат горливи теми. Преспанскиот договор, кој е потпишан на денешен датум во 2018 година, различно се толкува. Но, факт е дека неговото потпишување нѐ внесе во НАТО и ги отвори евроатлантските интеграции.

-Премиерот Ковачевски настапи на Преспа форумот на панелот во врска со 65 години од економската интеграција на ЕУ. Дебатата потоа продолжува на ниво на премиери во врска со економските прашања и прашања поврзани со Отворен Балкан, вели Исмет Рамадани, советник на премиерот за евроатлантски вредности за Утрински брифинг.

Рамадани вели дека во однос на интеграциите и односите на Македонија со Унијата, премиерот во своето обраќање уште еднаш потрврди дека сѐ што правиме треба да правиме со дигнитет оти ние нашите обврски одамна ги имаме извршно. Општиот став е дека време е Западен Балкан да биде интегриран во ЕУ и важно е што оваа меѓународна конференција ги раздвижи сите кои се поврзани со отворањето на нашите преговори со ЕУ и очигледно е дека го свртевме вниманието кон себе.

-Францускиот предлог е предлог кој прво треба да се отвори пред бугарските компетентни власти и органи. Таму амбасадорката на Франција е во интензивни разговори со Собраниската комисија за соработка со Франција, вели Рамадани за Утрински брифинг.

Постојат стравувања дека ако падне владата на Петков ќе нема кој да гласа за овој предлог на Макрон. Но, ова не е проблем на кој ние можеме да влијаеме оти станува збор за нивни внатрешни превирања кои се детектирани и од ЕУ и од САД, па сега зависи колку ќе ѝ биде дозволено на бугарската страна да се обидува да го одбегне притисокот кој сега е префрлен на нивна страна, анализира Рамадани за Утрински брифинг.

-Ние сега не треба да градиме ставови врз основа на шпекулации. Едно е сигурно, нашата влада нема да попушти ако во рамката има нешто што задира во идентитетот и македонскиот јазик. За тоа веќе имаме и резолуција од македонскиот парламент, вели Рамадани.

Тој додава дека наше суверено право е да кажеме суверено „не“ за вакви прашања, иако малку е веројатно да дојде до ваков предлог за компромис кој доведува под прашање нечиј идентитет и јазик затоа што тоа е спротивно на европските вредности.