Ременски: Внимателно да се известува за идентитетот на жртвите

Веројатно денеска ќе се одложи ЦО и ИО на СДСМ со оглед на тоа што Зоран Заев не е во Скопје поради тешката собраќајна несреќа на скопски автобус што се случи во Бугарија, па оттука разговорот со Фросина Ременски во Утрински брифинг го започнавме со несреќата.

-Ова е голема трагедија и треба да биде предмет на истрага што се случило. Сите очекуваат повеќе информации. Мое длабоко сочувство, вели Ременски.

-Местна и стварна надлежност имаат бугарските служби, полицијата, форензиката и т.н. но секако во билатерална соработка не се исклучува вклучување и на наши тимови. Тоа е посложена операција, станува збор за изгорени лица кои преку форензика треба да се идентификуваат како и испитување на машинската состојба на автобусот, вели Ременски за Утрински брифинг.

Како ќе се прави техничка форензика, како ќе се утврди начинот на кој се случила несреќата кога автобусот е запален?

-Потешко е, но ако се побара експертиза не е невозможно. Тоа е комплетно изгорен автобус, заглавен во еден меѓупростор што укажува дека немало превртување, бил во исправена позиција. Повеќе од убедена сум дека експлозија се случила внатре, да речеме мала плинска боца или сѐ што е поврзано со гас или запалива течност во допир со искричење при возење можело да доведе до силна експлозија што ги блокира сите автоматизирани системи на автобусот. Фактот што и возачот е загинат укажува на таква ситуација, објаснува Ременски.

Очигледно е дека треба да се вклучат и наши тимови. Како оди таа билатерална соработка?

-Тие соработни се на ниво на институционална соработка меѓу органите на двете земји, за што имаме потпишано договори. Веќе може да се воспостави таа соработка и треба бргу да се испратат наши тимови за да се одбегнат сите шпекулации. Оваа постапка ќе трае. Ако се сеќавате при падот на владиниот „кингер“ кај Мостар имаше помалку патници но идентификацијата траеше. Заради заштита на идентитетот сега не може да се објават никакви информации за идентитетот на загинатите и треба внимателно да се известува. Ако има и државјани на Албанија како што се вели, треба да се вклучи и таа земја, вели Ременски за УБ.