Речиси нема жена во Скопје што не доживеала сексуално вознемирување

Според истражувањето за сексуалното вознемирување на јавните простори во Скопје, кое го изработија Андреа Велинова и Јована Здравевска, нема ниту една испитаничка која одговорила дека не ѝ се случило, или не доживеала некаква форма на сексуално вознемирување на јавен простор.

„Нашето истражување кое опфати 231 испитаничка покажа дека ниту една од нив не доживеала само една форма на сексално вознемирување на јавен простор. Секоја од нив доживеала во најмала рака, по две или три форми на сексуално вознемирување. Тоа е насочено кон жените со цел да ги исплаши, деградира или заплаши. Има различни форми, од свиркање, дофрлување, коментари, попречување на патот, следење па се’ до физичко или сексуално насилство. Истражувањето покажа дека најчести се вербалните форми како обраќање со зборовите „маче“, „срцка“, „пиле“, пцуење, сексуалните навреди или директни коментари со сексуална конотација на кои сведочиме речиси секојдневно.

Нашата идеја беше да делуваме директно во јавниот простор. И за нас беа зачудувачки резултатите до кои дојдовме затоа што најфреквентните места во Скопје како што се Општина Центар, Аеродром и Чаир, потоа препознатливите места околу Железничката станица, улица „Македонија“, булеварот „Партизански одреди“, Старата скопска чаршија беа најчесто спомуваните локации каде што се случувало сексуалното вознемирување на јавен простор, односно каде што има раздвиженост во поголем дел од денот и ни стана јасно дека не само темните улици и места се локациите каде што се случува сексуалното вознемирување на жените“, вели за Утрински брифинг, Јована Здравевска, експерт за кривична правда и безбедност.

Таа додава дека ова однесување не е регулирано со кривичниот законик. „Тоа претставува еден голем недостаток затоа што нашата држава ја има потпишано Истанбулската конвенција која бара државите потписнички да се справат и со сите видови на сексуалното вознемирување на жените“, додава Здравевска.