Секирарска: Оценката стана единствено мерило за успех, а никој не се прашува колку реално знаат децата

Низ македонските медиуми во фокусот на вниманието беше веста дека многу мал процент од петкашите, под 10 отсто, го потврдија својот успех на тестирањето за запишување во гимназијата „Орце Николов“ во Скопје.

-Свесни сме дека предолго не функционираат нештата во образованието и ова не е од сега, ова е нешто што се провлекува со децении само што сега стана видливо. Тажнисме, да, но не сме изненадени, вели Елизабета Секирарска, долгогодишна професорка, за Утрински брифинг.

Секирарска вели дека ова е еден од многуте аларми кои се постојано вклучени во последниве 30 години. Како која гарнитура ќе дојде на власт, првата работа е да се исклучи алармот, додава таа.

-Ако од 292 кандидати само 11 го задржале својот успех, а бројот на единици е огромен, тоа е страшно. Образованието е клучно, а ова што се случи покажува каде сме ние, ние ги изгубивме децата по пат, вели Секирарска.

За тоа дали може да се исправи нешто што е пропуштено во тие четири години на средно училиште, Секирарска вели дека образованието е верижен процес.

-Децата доаѓаат кај мене од основно образование феќе формирани на одреден начин. Децата продолжуваат со полни ранци и празни глави. Ги разбирам родителите што застауваат во одбрана на своите деца, во крајна линија децата и не се виновни. Но, кај нас оценката стана единествено мерило, а никој не се прашува колку реално знаат децата, вели Секирарска.

Секирарска вели дека неоспособувањето на децата за критичко размислување е и вина на учителите под влијание на притисоци кои предолго се врз нашите глави а се општествено условени.

– Дозволивме влијанијата врз нас да се одразат врз децата. Ако јас влезам во училницата со ентузијазам, можеби тој ентузијазам ќе се прелее врз децата, но ако влезам како зомби можам да произведам само зомби, вели Секирарска за Утрински брифинг.

-Учениците се посклони да набубаат отколку да посветат внимание и да го разберат нештото. Тие добивале петки и тоа не го спорам, но колку знаење примиле е друга работа, вели Секирарска.

Околу дисперзијата на високото образование Секирарска вели дека тоа е едно од најлошите решенија.

-Би сакала секој да може да студира, но не е можно сите да имаат капацитет за студирање, вели Секирарска.

Се согласувам дека процесот на реформи треба да се фокусира кон средното образование, но и да се фокусира на истражување на пазарот на трудот. Секирарска вели дека улога има и ковид пандемијата која психички ги погоди децата кои мораа да се соочуваат со болести и смрт.

-Ние веќе бевме толерантни со оценките за време на пандемијата, ама петките навистина се неиздржани, вели Секирарска за Утрински брифинг.