Скерлев: За секоја чест е јубилејот на кралицата Елизабета која 70 години е на тронот

Британија има три неспорни светски брендови – Би-Би-Си, Премиер лигата и британската кралица Елизабета Втора која деновиве слави јубилеј од 70 години на престолот. Прославата ќе трае четири дена.

-За британското општество ова е една голема причина малку да застане и да слави, оти по две години пауза во ковидот, покачувањето на цените и стресовите, конечно има четири дена празник. Се слави на различни начини. Лондон е полупразен од лондончани, но полн со луѓе кои дојдоа од секаде од Обединетото Кралство и од секаде од светот. Вчера имаше 100 илјади луѓе собрани пред Бкингемската палата, известува новинарката Жанета Скерлев од Лондон за Утрински брифинг.

Таа додава дека ова е јубилеј за почит, оти не се памети во историјата на Обединето Кралство еден ваков подвиг.

Вчера беа запалени огновите на империјата кои имаат симболика, а потоа почна да се палат и во другите земји на Комонвелтот.

-Ова е нешто како штафетата во некогашна Југославија, тоа е прослава со многу вклучени луѓе и со многунастани – од изложби, до концерти, а сите Музеи се отворени и посетата е бесплатна. Ова е еден голем фестивал. Дури и оние кои не се ројалисти го користат овој период за релаксација и славење.

Скерлев вели дека кралицата е за секоја почит оти го жртвуваше својот живот за да ја врши таа улога, а во нејзиното владеење се изменија 14 премиери. Сите овие премиери одат една неделно на аудиенција кај кралија која ги сослушува што некако им доаѓа како психотерапија оти тоа што кажале таму никогаш не излегло во јавноста, вели Скерлев за Утрински брифинг.

Елизабета Втора стана кралица во 1952 година по ненадејната смрт на татко ѝ во време кога беше релативно млада. Денес кралицата ќе остане да одмора бидејќи има 96 години и вчера се измори од настаните. Нејзиното здравје во Британија го опишуваат како кревко, а за првпат ја видовме и со бастун. Најверојатно ја чува силата за главниот дел од прославата в недела.

-Откако кралицата не учествуваше на парламентарната сесија, што е традиционален настан, а обврската ја делегираше на нејзиниот син принцот Чарлс и внукот принцот Вилијам, почнаа шпекулации за наследството на тронот. Во Британија нема посебно расположение наследник да биде принцот Чарлс кој за разлика од Елизабета многу има зборувано во јавноста за себе и својот живот и ставови, вели Скерлев.

Принцот Чарлс има 70 години и тешко е веројатно дека може да го доживее ваквиот јубилеј дури и ако стане крал на Велика Британија.

Проследете го целиот разговор во видеото