Скоро 66 отсто девојки од Тетово и Гостивар доживеале сексуално вознемирување на интернет

Според истражувањето на Центарот за еднакви можности „Бубамара“ 65,8 отсто од девојките од Тетово и Гостивар на возраст од 18 до 25 години се соочиле со сексуално вознемирување на интернет. Тоа беше повод за изложбата „Од инбокс во плоштад“, кога натписи со пораките беа поставени на градскиот плоштад во Тетово.

„Со тоа што ги поставивме натписите во центарот на градот сакавме сите да видат што се’ има во инбоксите на младите девојки. Спроведовме анкета со повеќе од 200 девојки на возраст од 18 до 25 години со цел да откриеме колку од овие девојки, кои се се’ уште во раните дваесетти години се жртви на сексуално вознемирување, што подразбираат под тој поим и дали се подготвени да го пријават. Видовме дека околу 80 отсто од девојките знаат што значи сексуално вознемирување, а 3,8 отсто признааваат дека не знаат што е тоа, а 10 отсто не сакале да кажат дали се запознаени со овој вид вознемирување. 65, 8 отсто од девојките примиле пораки од момчиња или мажи кои содржеле разни форми на сексуално вознемирување на социјалните мрежи, говор на омраза, закани и навреди. 32 отсто од испитаничките кажале дека не примиле такви содржини, а 1,9 отсто одлучиле да не одговорат на тоа прашање. Нашата цел е да ги мотивираме девојките да не ги игнорираат овие пораки туку да ги пријават, затоа што поголем дел од нив претпочитаат да му се обратат за помош на семејството, а 25 отсто се обраќаат на полицијата, а голем број од девојките одговорија дека не знаат каде да се обратат“, вели за Утрински брифинг, Рита Бехадини, претседателка на Центарот за еднакви можности „Бубамара“ од Тетово.

Таа кажа дека имаат намера да продолжат со акцијата на изложување на вознемирувачките пораки н ајавни места и следен град ќе биде Гостивар.