Стефоска: Резултатите од годишниот конкурс на Министерството за култура ќе ги објавиме на 20 јануари, 2022 година

Од 4 октомври до 6 ноември тече рокот за пријавување на годишниот конкурс за поддршка на проекти од национален интерес за културата за 2022 година. Рокот за пријавување е продолжен, бидејќи оваа година, првпат аплицирањето се одвива преку електронски пат

„Се извинив за долгогодишните чекања и редици пред Министерството за култура, носењето на пријавите на рака. Накратко да илустрирам колку заштедуваме во време и се забрзува целиот процес – лани имавме 6000 пријави, документите се носат рачно, се архивираат рачно, службите ги внесуваат на компјутер пријавите, една по една…И она што е многу важно е што со овој систем на аплицирање, конечно секоја можност за злоупотреба. Секоја година, едни се жалеа дека документите што ги доставиле исчезнале, службите велат – не, или обратно и тоа го слушавме секоја година. Сега електронски, точно ќе се знае што доставиле апликантите и тоа е во посебен фолдер. Секој апликант си добива број и секоја апликација, електронски се архивира во Министерството за култура. Ова ќе го забрза процесот и очекувам до 20 јануари, идната година да излеземе со конечните резултати од конкурсот. Комисиите веќе работат со националните институции и по завршувањето на конкурсот продолжуваат со другите корисници“, рече министерката за култура Ирена Стефоска за Утрински брифинг.

Притоа таа ги замоли сите заинтересирани да аплицираат на Годишниот конкурс да не го чекаат последниот рок, затоа што системот тоа не може да го издржи.