„Стихови на душа“, традиционална поетска манифестација во организација на о. Илинден
По 22 пат во Домот на култура во о. Илинден се одржува традициналната манифестација „Илинден 2021“. Покровител на манифестацијата е Општина Илинден и градоначалникот Жика Стојановски, кој во интервју за Утрински брифинг вели дека несебичното одделеување од буџетските средства за зачувување на традицијата, ја направило оваа манифестација долгогодишна.
– Манифестацијата започна вчера, со одбележување 100 години од раѓањето на Блаже Конески, истакнатиот македонски книжевен, културен и јавен работник, академик, прозаист, есеист, книжевен историчар, филолог и јазичар, преведувач… Беседа за книжевното и научното дело на поетот и кодификатор на македонскиот јазик одржа проф. д-р Весна Мојсова Чепишевска. Во рамките на првата вечер од манифестацијата се одржа промоција на Избраните дела во десет книги од Раде Силјан, со реч на академик Витомир Митевски. Вечерва е централниот поетски митинг наречен „Стихови за душа“. Учество ќе земат значајни имиња од македонската литература и поезија, а најавени се и гости од странство, како Паскал Гилевски, Стојан Тарапуза, Иван Чаповски, Кристина Николовска, Христо Петрески, Љерка Тот Наумова…Поети од странство кои поради пандемијата не се во можност лично да присуствуваат, онлајн ќе се обратат до љубителите на пишаниот збор. Меѓу нив се наоѓаат и познатиите писатели Јожеф Бенце од Унгарија, Сретен Перовиќ од Црна Гора, Владимир Луков од Бугарија, Милан Јазбец од Словенија, Љиљана Стејиќ од Србија и Ѓуро Видмаровиќ од Хрватска, рече Стојановски.
Тој вели дека богатството на литературната манифестација е во дружењето и во промоцијата на литературата, но поради почитување на протоколите бројот на учесници ќе го следи просторот и протоколите.
– Масовноста оваа година ќе изостане, но на нашата веб страна ќе ги објавиме сите песни на учесниците. Верувам дека на тој начин ќе им компензираме на заинтересираните љубители на пишаниот збор, на кои инаку во изминатите години им организиравме превоз до Општина Илинден. Од друга страна ме радува дека манифестацијата инспирираше многу млади поети, кои порано на манифестација се јавуваа како ученици, а сега се веќе поети кои имаат издадено сопствени книги. Верувам дека во иднина тие преку литературата ќе ја промивираат Македонија и надвор од границите, вели Стојановски.