Стојанова: Реставрацијата на Курбиново беше запрена изминатите месеци, ќе продолжи во април
Заради временските прилики во моментот е запрена реставрацијата на црквата „Св. Ѓорѓи“ во Курбиново, вели Мери Стојанова, директорка на Завод и музеј – Битола.
„Кон крајот на минатата година се заврши со сите административни и подготвителни активности, кои беа поврзани со стручна подготовка на самиот објект за она што треба да следи во оваа и во наредните години. Се работеше на обивање на малтерни маси коишто беа со лош квалитет и кои биле ставани во изминатите неколку децении при конзервацијата на споменикот. И со заладувањето на времето, на крајот на 2020 година конзерватораките работи беа сопрени и тој застој се’ уште трае, а во текот на април ќе се продолжи со предвидеите активности. Во текот на оваа година треба да се реализира постапката на инјектирање на ѕидните маси, односно зацврстување на постоечкиот објект, потоа ставање на затеги коишто што треба да ја зацврстат конструкцијата на објектот и ред други специфични активности кои се предвидени со проектот за конзервација и реставрација на црквата. И во периодот кога се работеше проектот и по започнувањето на неговата реализација ние се обидовме да ги вклучиме дел од најеминентните стручњаци за кои колегите сметаа дека можат значајно да допринесат и реално, никогаш од наша страна не била одбиена стручна помош од секој што ја понудил.
Што се однесува на конзервацијата, во овој процес не се вклучени само колегите од нашата институција, туку како надзор се вклучени и колеги од ИЗИС, колеги од Завод и музеј Прилеп, кои со своето долгогодишно стручно искуство во заштитата значително допринеле за да се реализира ваков тип на споменици каков што е споменикот Св. Ѓорѓи во Курбиново, кој по својата вредност тој е немерлив со ниту еден друг во државата“, вели за Утрински брифинг, Мери Стојанова, директорка на Завод и музје Битола. Таа рече дека во процес на реставрација се и спомен куќите на Стив Наумов и Гоце Делчев во Битола. „Овој процес трае три години и досега се преземени зафати во ентериерот на самите куќи, конкретно во спомен куќата на Стив Наумов беше направена замена на дограмата, беше поставена нова електрична инсталација, која беше дотраена и исклучително опасна не само за самиот објект, туку и за околните приватни објекти, а минатата година се изврши и комплетна промена на кровните конструкции, така што сега во контекст на одобрените средства ќе видиме кои се приоритетни активности кои треба да се преземат“, додаде Стојанова.