Струмичкиот градоначалник: Од оваа дистанца, откажувањето на карневалот беше многу исправна одлука

Откажувањето на струмичкиот карневал, што е значајна манифестација за градот, од оваа дистанца се гледа дека беше многу правилна одлука, смета струмичкиот градоначалник Коста Јаневски. „Струмица се исправи пред една тешка одлука, откажавме значајна манифестација.

Во тој момент имаше доста полемики меѓутоа од денешна перспектива се гледа дека тогаш сме донеле правилна одлука која ги заштити граѓаните. Оттогаш почна алармот меѓу народот, по што со општинскиот штаб започнавме координативни состаноци со институциите“, изјави Јаневски во денешниот Утрински брифинг. Јаневски вели неговата општина врши постојана дезинфекција на улиците и јавните површини, дека заштитни средства има доволно, а изминатиов период, со ретки исклучоци во првиот ден, струмичани се дисциплинирани при придружувањето на мерките на Владата.

„Свеста е значително зголемена, струмичани сериозно и одговорно ја сфаќаат сериозноста. Ние направивме во меѓувреме некои чекори. Ги затворивме сите детски игралишта, од вчера затворена е и трим патека која голем број струмичани ја користат, ги затвораме пазарите“, инфомираше градоначалникот. Во Струмица има околу 170 повратници кои се во самоизолација од нив 10 со решенија, останатите во самоизолација.