? Тозија: 2020 започна исклучително успешно, очекуваме рестартирање на целиот процес и нови големи светски успеси на македонската кинематографија

Одобрувањето за пренамена на средства од Агенцијата за филм со цел доделување еднократна помош на независниот филмски работник е разбирање за неговиот статус и борба за одржување на овој специфичен кадар, соопштија од Агенцијата за филм за Уредбата со законска сила што ја донесе Владата за финансиска поддршка на филмските работници за време на вонредната состојба.

-Независните филмски работници и официјално добија рамноправна субвенција во рамките на изгласаната Уредба со која законски се утврдува финансиската поддршка на филмските работници за време на вонредна состојба, изјави во Утрински брифинг, директорот на Агенцијата за филм, Горјан Тозија.

ДФРМ и Агенцијата за филм на РСМ уште на самиот почеток на вонредната КОВИД-19 криза апелираа до Владата преку матичното Министерство за култура за поддршка на филмските работници. Оваа иницијатива имаше за цел, пред сè, да укаже на специфичната природа на ангажманот на филмските работници кои егзистираат единствено од независни филмски проекти.

Во заедничката иницијатива јасно се дефинирани кои професии спаѓаат во оваа група работници: режисер, помошник режисер, костимограф, монтажер, организатор на снимање, продуцент, фарист и многу други единствени занимања кои би биле квалификувани за доделување на субвенцијата – исплата на две минимални нето-плати – од 14.500 денари, односно вкупно 29.000 за двата најкризни месеца: април и мај.

-Со овие мерки ќе ги заштитиме македонските уметници да не одат надвор, изјави во Утрински брифинг директорот на Агенцијата за филм, Горјан Тозија.

Околу помошта која Агенцијата за филм ја обезбеди за помош на филмските работници Тозија смета дека нашиот модел на помош беше прв во Европа за потоа да биде преземен и од други европски земји.

-За жал и покрај успехот на „Медена земја“, имаше филмови кои не го видоа денот токму заради тоа што се поклопија со номинациите за оскар и наградите кои ги доби токму документарниот филм „Медена земја“, изјави Тозија.

-Агенцијата за филм на Република Северна Македонија со нетрпение го очекува рестартирањето на целиот процес во филмската дејност и новите големи светски успеси на македонската кинематографија.