Топузовска Латковиќ: Со позитивни примери на успешни жени може се надминат родовите стереотипи
Студијата за жените во Република Северна Македонија 2020/2021 година на Фондацијата „Фридрих Еберт“ е досега најсеопфатно истражување за позициите на жените, која содржи податоци добиени од истражувачки примерок на 1066 испитанички.
„Дојдовме до сознание дека на жените им е најважно во животот да живеат во перспективна земја, да формираат семејство, да имаат сигурно работно место и да бидат независни, сепак, иако на генерално ниво податоците покажуваат дека на жените им е најбитна сигурноста и независноста, кога направивме статистички анализи видовме дека има разлики особено според етничката припадност. Така, кај жените од македонска етничка припадност се забележува дека се доминантни вредностите за хедонизам, самореализација, социјализација, додека пак кај жените со албанска етничка припадност излезе дека се побитни вредностите на почитување на религијата, традицијата, но и политичката активност и граѓанскиот активизам. Значи навистина имаме разлика во поглед на вредностите.
Тоа се должи на патријахалната матрица која што е застапена во земјата, на традицијата, разлики во воспитувањето, вредностите што се промовирани во заедниците и во општеството. Позитивно е тоа што според нашите резултати, жените во нашата држава се стремат кон родова еднаквост но само на когнитивно ниво, бидејќи во поглавјето на студијата „Социјален и семеен живот“, видовме дека тие прават нешто друго и дека родовата еднаквост не постои, бидејќи на пример во домот жените имаат најголем товар околу домашните работи, а 66 отсто од жените одговориле дека мажите што се вработени немаат време да се посветат на семејството и тоа ни укажува дека жените се презафатени и со неплатена работа во домот. И понатаму на прашањето како би ја оцениле родовата еднаквост во врската или бракот, поголемиот дел од испитаничките ја оцениле со висока оцена 4 од 5, исто така одговориле дека поделбата на одговоностите е фер и праведна што значи имаме спротивставени одговори и тоа би можело да биде предмет на понатамошни истражувања за тоа како жените ја разбираат родовата еднаквост.
Стереотипите се многу застапени во општеството и претставуваат кочница во развојот на родовата еднаквост и затоа е многу значајно и во образованието и медиумите да работат на разобличување на стереотипите и што повеќе да се споделуваат успешни приказни за жени за да видиме дека тие не се само одговорни за домот, туку дека се и вработени на одлучувачки позиции“, вели за Утрински брифинг, професорката Марија Топузовска Латковиќ од Институтот за социолошки и политичко правни истражувања.