Трајанов: Само преку нов закон за докажување невиност ќе се разбие синџирот на судски злоупотреби

За жал преку одлуки од политичкиот врв кои потоа се проследуваат до полицијата, која пак припрема се што треба да припрема и ги проследува до Јавното обвинителство кое е дел од овој синџир на коруптивно однесување, монтирани предмети завршуваат како судска одлука од Судот. Судот ги потврдува политичките одлуки преку кои се осудуваат политички противници, од лична одмазда или поради бизнис

Со цел да се разбие синџирот на политизирани судски постапки, односно монтирани случаи, неопходен е нов закон, вели пратеникот и лидер на Демокраскиот сојуз, Павле Трајанов, кој е предлагач на Закон за преиспитување факти и докази користени во судска постапка.

Во Утрински брифинг, Трајанов објаснува зошто е неопходен ваков исчекор, потенцирајќи дека неговата намера не е да амнестира некого туку оние кои се неправедно осудени, да добијат шанса да ја докажат својата невиност.

„Долго време се зборува дека има монтирани политичко-полициски случаи и како резултат на сите анализи и согледувања дека навистина голем број судски одлуки не се засновани на факти и докази, дека се прекршувани законите, едноставно се загрозени основните човекови права, за жал преку одлуки од државниот врв кои потоа се проследуваат до полицијата, која пак припрема се што треба да припрема и ги проследува до Јавното обвинителство кое е дел од овој синџир на коруптивно однесување и тие предмети одат до Судот. Така подготвени, Судот со судска одлука ги потврдува тие политички одлуки и така се осудуваат политичките противници, поради лична одмазда или поради бизнис“, образложува Трајанов.

Тој смета дека преку ваквиот закон, кој го предлага по редовна постапка пред своите колеги пратеници, би се создале законски прописи за фер судења и сите кои имаат докази или информации би можеле да докажат преку повторна постапка, дека се невини а осудени.

„Сигурно дека сите постапки нема да се повторат, сигурно дека и кога би се повторила постапката, некои случаи ќе завршат на исти начин, со иста одлука, но проценките се дека најмалку 30 отсто од случаите ќе бидат повторени и дека можна е поинаква завршница. Транспаренси Интернешнл правеле анализа на 12 случаи и врз основа на таа анализа, тврдат дека има судски одлуки кои се засновани на нерелевантни факти и докази. Дека се прекршувани законите. Тоа е доволна основа за овој предлог. Се разбира дека не е можно во повторените постапки да учествуваат истите судии кои ги донеле одлуките, напоменува Трајанов.

Законот за преиспитување факти и докази користени во судска постапка, предвидува исполнување на неколку основи, а меѓу нив најпрво доколку е повредено начелото на пресумпција на невиност, второ, доколку се користени разговори од злупотреби на системите за прислушување и доколку се користени лажни заштитени сведоци подготвени од полицијата.

Пратеникот Трајанов потсетува дека Министерството за правда веќе има утврдено дека системот за распределба на случаи во судовите (АКМИС) е злоупотребуван, односно дека некои претседатели на судови ги насочувале предметите кај судии кои имале влијание и кои носеле одлуки какви што сака државниот врв.

„Ако има такви случаи, кои се основа за ова барање за нов закон, верувам дека ваквата реформа е неопходна. Низ овој закон ќе се види улогата на секој, од државниот врв, преку носителите на високи позиции во МВР, на иснпектори за организиран криминал, на судии и обвинители, претседателите на судовите…тоа е начинот да се види дали нашиот судски систем е кредибилен или треба коренити реформи. Не може да има траен мандат судијата, никогаш да не се проверува неговата работа, односно дали работи по инструкции на политиката, полицијата, бизнисмени и други центри на моќ“, потенцира Павле Трајанов.

Од овој закон, освен транспарентност, може да проилезе и постапка за кривична одговорност.

„Доколку се докаже злупотреба на било кој носител на функција, тоа ќе биде основа за разрешување и оттаму да се започне постапка за кривична одговорност. Ако некој очигледно ја злоупотребил судската функција, знаел дека се работи за монтиран случај, за тоа треба да понесе одговорност. Овој закон е транспарентен за целото општество и еднаков за сите. Апелирам пратениците да го проучат добро овој предлог бидејќи до одговорност само вака може да дојдеме“, вели Павле Трајанов во Утрински брифинг.