Утрински брифинг во Спомен собата на Крсте Мисирков
По повод 95-годишнината од смртта на великанот Крсте Петков Мисирков отворена е подновената спомен-соба на Мисирков во Институтот за македонски јазик во Скопје. Директорката на Институтот Елена Јованова – Грујовска денеска во УТрински брифинг истакна дека поставката постои над 40 години, а ова е второ нејзино подновување, кое е во чекор со техничко-технолошкиот развој. Подготвена е од вработените во Институтот, а е реализирана со финансиска поддршка од МОН и од Градот Скопје.
-Многу сме горди што ова се реализира во годината кога одбележуваме 95 години од смртта на Мисирков, 100 години од раѓањето на Благоја Корубин, еден од основачите на Институтот и особено во годината на Конески. Мисирков во книгата за „Македонцките работи“ ги постави основите на првата стандардизација на македонскиот јазик, Конески ги реализира идеите за современа македонска азбука, правопис и институционална кодификација на македонскиот јазик во македонската држава, рече Јованова – Грујовска.
Во годината на Конески таа најави дека Институтот за македонски јазик се јавува како носител или коорганизатор на повеќе настани и манифестации, а посебно го издвои електронското издание на Толковниот речник на македонскиот јазик, за кој минатата година оваа институција ја доби наградата за наука „Гоце Делечв”. Старите документи од претходната поставка се зачувани во електронска форма и заедно со нови фотографии и документи, сведочат за целиот живот на Мисирков, почнувајќи од детството, преку училишните клупи и студиите до образовната, научната, дипломатската и револуционерната активност на првиот кодификатор на македонскиот јазик. Посебно место зазема книгата „За македонцките работи”, објавена во револуционерната 1903 година, пред цели 118 години.
Директорката на Институтот за македонски јазик, смета дека секоја институција треба да вработува лектор за да се овозможи вработување на дипломците од Факултетот за македонски јазик и книжевост, со што пак би се актуелизирала оваа Катедра на Филолошкиот факултет.