Фидановски од АВМУ: Секој потег кој што води кон релаксирање на односите помеѓу С Македонија и Бугарија е за поздравување
Специјалниот владин претставник за Бугарија, Владо Бучковски потврди дека е договорено од март сателитскиот канал на Бугарската национална телевизија – БНТ 4, освен преку операторот А1, да се реемитува и на „Макс ТВ“ на Македонски Телеком, во кој државата има свој удел. Истовремено, сателитскиот канал на Македонската телевизија да се реемитува на бугарските телевизиски оператори.
Исто така, се чека и завршување и на процедурата околу документацијата за три приватни бугарски телевизии да можат да се реемитуваат во Македонија, а до крајот на февруари истото ќе се направи и со три до четири приватни македонски телевизии за реемитување во Бугарија.
Гостин во Утрински брифинг беше новинарот и член на ААВМУ, Зоран Фидановски.
Сателитскиот канал на Бугарска телевизија и „Блумберг“ веќе се емитуваат преку операторот А1. БНТ4 заедно со „Блумберг“ и со уште некои други ќе оди и на „Макс ТВ“ која според истражувањата е најгледана платформа. Идејата е бугарскиот сателитски канал да го гледаме овде, а македонски канал од јавниот сервис да оди на некој од бугарските канали за бугарските гледачите да имаат претстава што тоа се пренесува преку националните сервиси.
Доколку во нашите програмски пакети имаме дваесетина програми, канали од овој регион, не е спорно за мене да имаме неколку канали и од соседна Бугарија, за да видиме не само како функционираат политичките случувања таму, туку едноставно на овој начин се збогатува и медиумскиот плурализам. Ќе имаме подобар избор да видиме и колку се тие продукциски напреднати, изјави во Утрински брифинг Фидановски.
Сметам дека секој чекор кој што значи согласност за некое прашање за мене е чекор напред во релаксирање на односите помеѓу двете држави. Препоставувам дека се оди по логиката оние прашања кои се помалку проблематични да се надминат. Затоа и овој потег го оценувам како добар, затоа што придонесува за една порелаксирана атмосфера, дека решенија можат да се најдат, вели Фидановски.
Целиот разговор погледнете го во видеото