Јовановски, Леловац: Перформансот „Драга републико“ зборува за изградба на подобро општество

Во зградата на Централната пошта во Скопје, вечерва, утре и во сабота на 2 октомври ќе биде изведен перформансот „Драга Републико“, на авторите Филип Јовановски, Кристина Леловац и Ивана Васева во соработка со кореографката Викторија Илиоска.

По перформансите „Оваа зграда зборува (на)вистина“ и „Универзална во пламен“, ова е нов перформанс од трилогијата посветена на модернистички згради во Скопје. „Драга Републико“ е перформанс-есеј за објектот на Телекомуникацискиот центар во Скопје, кој е еден од најрепрезентативните модернистички објекти во земјава.

„Самата постапка на ова што го работиме веќе четири години, со која практично одново ги читаме зградите како текст, ако правиме аналогија со театар. Така, читајќи ја оваа зграда на Поштата стигнавме до интересни информации и за самата зграда и за пожарот во кој е уништена централната сала, најдовме податоци од судското рочиште за пожарот и оттаму ја развивме целата приказна за овој објект. Во пожарот се изгорени фреските на Борко Лазески, кој соработувал со архитектот Константинов, двајцата биле членови на групата „Денес“, нивното дело беше спој на ликовната уметност и архитектурата, беше на тема антифашизам и тоа дело изгоре и тоа сакавме да го актуелизираме. Овој перформанс се надоврзува на претходните, главна улога имаше самиот простор, премногу силни се тие изгорени ѕидови и како со уметност, со театар да одговориш на тоа“, вели за Утрински брифинг, Филип Јовановски, еден од авторите на проектот.

„Еден од предизвиците беше тоа како со уметност воопшо може да се интервенира во еден таков простор, кој е врвно архитектонско дело во еден град кој е прогласен за главен град на светската солидарност. И тоа архитектонско ремек дело веќе седум години стои уништено од пожар. Сега се развива некаква носталгија кон нешто што е девастирано и кога ги читате белешките од судските рочишта гледате како целиот проблем е доведен до најмала можна одговорност, и да претставата можеби има апокалиптична атмосфера, со која ние всушност бараме одговор на прашањето дали е возможно нешто да се изгради и дали со овие начини можеме одново и одново да градиме општество, во што и веруваме“, рече Кристина Леловц, една од авторките.

Јовановски додаде дека перформансот „Драга републико“ е повеќе во духот на надежта за подобро општество, но потсетување на фашизмот и уште повеќе на антифашизмот.

Проектот се реализира со поддршка на Владата, а во рамки на јубилејот 30 години независност. Во реализацијата на проектот учествуваат и Емилија Чочкова, Дениз Ајдаревиќ, Бранко Атанасов, Симона Димковска, Нина Елзесер, Изабела Јакимова, Нела Павловска, Сандра Танчева, Дамјана Апостоловски, Мартин Блажевски, Мариана Бошковска, Шинаси Рамадан, Дино Хрџиќ, Иванчо Велков, Миле Крстевски, Владо Димоски, Александар Јовановски и Миа Николоска.