Фрчкоски: Идеите за поделба на територии си имаат последици, С. Македонија се движи на правилен меѓународен пат

Тезите кои ги пласира Кристофер Хичинс, дека не го нервираат само глупави луѓе и идиотски тези туку слабата аргументација, е релевантна и за случајот со нон-пејперот на словенечкиот премиер Јанез Јанша, вели професорот Љубомир Фрчкоски во анализа на Утрински брифинг.

„Тие тези имаат големи опашки, од друга страна има перверзна страна кај тие типови кои влегуваат со вакви еурека решенија, што им претставува задоволство, кога посебно либералите ги нервираат, па тие после аргументираат „Војна, војна“ и целата таа расправа е одбивна, одвратна. Не враќа назад во нереализирани ситуации. Овие идеи не се нови. Од времето на Југославија, кога Туѓман на салфетите ја црташе поделбата на Босна меѓу Србите и Хрватите, сите расправии околку распадот на големите федерации и идеите за поделба на Македонија долж конфликтот. Сè тоа пропадна. Аргументацијата на сето тоа пропаѓање треба да биде научена“, дециден е Фрчкоски.

Во анализа која се однесува на регионот и дома, професорот Фрчкоски потсетува на консеквенци, образлжувајќи дека се работи за неодржливи тези за поделба на териториите.

„Позадината на идеите кои се вртат, имаа консеквенци. Целиот распад на поранешниот источен блок одеше во спротивна линија од оваа. Онаму каде што требаше да се експериментира со етнички хомогени држави не се направи, туку распадот одеше по републичките граници, и тоа беше Бадентеровиот извештај, тоа се сите енергии на ЕУ, до признавање на тие нови држави. Тие отидоа по мултикултурни држави.

Српскиот концепт спротивен на тоа, немаше успех. Тој тргна во војна, се изгубија жртви и создаде внатрешна поделба на Босна, не ја ни припои, туку од Босна со Дејтон создаде тотално нефункционална држава. Тоа е консеквенца од идејата. Идејата за поделба на Косово, според проценките, дека најмалку 2 милиони луѓе ќе се движат во двата правци (Србија – Косово), практично етничко чистење кое не може да заврши без насилство. Го баталија и тоа, и после некое време повторно доаѓа некаква ваква идеја, па треба да се потсети на консеквенците“ објаснува професор Фрчкоски.
Анализирајќи ги случувањата на домашен план, тој смета дека во актуелниот политички амбиент, премиерот Зоран Заев го имал политичкиот инстинкт, но не и комплетното знаење.

„Не е доволен само политички инстинкт. Заев има добар политички инстинкт, во меѓународната знае добро да решава. На пример кај идејата за личните карти, тој има инстинкт дека нешто треба да направи, но дефиницијата за ставање на национално етничко потекло на лицето во личната карта е фашистички проект, тоа не е ослободувачки проект, како што тврди албанската опозиција. Тука треба не само инстинкт туку и знаење. Од 137 земји, само неколку држави ставаат етнички признак. Тоа се две држави во Латинска Америка, три во Африка и две во Азија. Тоа обележување на групата е гетоизирање и во принцип со геноцид завршуваат тие општества. Оваа идеја овде личи ослободувачка, а всушност води кон сосема друга насока. За овој проект треба да има поголемо знаење и одговорност“, посочува Фрчкоски.

Деканот на Универзитетот ФОН, вли, наспроти општото разочарување кај Македонците, тој мисли дека „државата гази во правилна насока“.

„Нормално дека Социјалдемократите секогаш имале проблем со кадровската селекција, тоа множество на мали глодари околу главниот пилар може да ги упропасти. Сега ги гледате овие мали ситни нечисти афери, може да ја упропасти сликата за партијата.. Но во принцип, одиме кон правилен пат и на меѓународен пат како и со состојбата со слободите, а тешко оди во реформите во правосудсвото, ама таму ни кадарот не доволен. Во меѓуетнички план го држат добро односот во вешта политичка калкулација внатре и мислам дека кризава ја поминавме без рушење на болниците. Системот е нападнат. На луѓето им се досадни овие на власт, медиумите се главно сите критички, тоа се случува после три години на власт. Треба да издржат со јака кадровска структура, чиста и чесна за да може таа гарнитура да ја издржи реакцијата на јавноста, но мислам дека правецот е јасен“, вели Фрчковски при својата анализа на Утрински брифинг.