Црквата се подготвува за празнување на Велигден според сите протоколи за заштита од вирусот

Денеска е Велики четврток, денот кога почнува најстрашната драма во историјата на човештвото, рече во Утрински брифинг Отец Сашо од Соборниот храм во Скопје. 

-Преку употреба на виното и лебот ние го примаме Господ и добиваме вечен живот. Лебот и виното преку Светата литургија се претвора во тело и крв Христово. Токму Велики четврток е симбол на Светата причест и Тајната вечера. Но, Велики Четврток не потсетува и на големото предавство што го извршил Јуда.  Тој прво зема од лебот, а потоа заминува да го предаде Исус Христос, по што го приведуваат Исус Христос и од тогаш почнува најголемата драма во историјата на човештвото, потсетува на дамнешните настани Отец Сашо.

За да сострадаме со Господ Исус Христос треба подготвени да го дочекаме празникот. По тешките настани, предавството, распнувањето на крстот и смртта, настапува воскресението, што всушност е нашата надеж и вера.  Отец Сашо вели дека сите божји храмови ќе бидат отворени за време на велигденското празнување, со почитување на сите здравствени протоколи за безбедност на здравјето и заштита од вирусот. 

-Ред во црквите секако дека ќе има, ќе поставиме и луѓе кои ќе бидат задолжени да го одржуваат редот. Нас ни е многу важно здравјето на верниците. Но, апелирам до верниците да не се плашат да дојдат во храмовите бидејќи Господ знае секое зло да го преобрати во добро, а тоа најдобро ни го покажува Велики Петок. Тогаш демонскиот свет се радувал на смртта на Господ без да знае дека после смртта доаѓа воскресението и дека Господ е поголем од се. Истото го мислам и за пандемијата, го чекаме денот кога Господ и најголемата загуба ќе ја претвори во победа, вели Отец Сашо. 

Фарбањето на црвени јајца е обичај кој не приближува до Бога. -Првото црвено јајце Марија Магдалена му го принела на царот Тибериј со зборовите „Христос Воскресе“ и со тоа ја изразила својата вера. Црвеното јајце е симбол на страдањето и распнувањето на Исус, но и на неговата победа над смртта. Јајцето исто така носи и нов живот, како што со воскресението дојде новиот живот и спасението, што вусшност е целата смисла на нашата проповед и нашата вера.