Шурбановски: ОФФест е најефикасната вакцина против шундот и кичот
Јубилејното 20. издание на „ОФФест“ започнува вечерва (9 ноемри) со документарниот филм посветен на Амалија Родригез, позната како „кралица на фадото“, во кино Фросина и потоа концертот на дуото Лина и Раул Рефри во Националната опера и балет, кои изведуваат модерно и надградено фадо, музика што ги надминува географските одредници.
„ОФФест започна во 2002 година, а пред да го започнеме фестивалот, на Скопскиот џез фестивал имаше многу бразилска, кубанска, латиноамериканска музика и често добивавме добронамерни критики: „па ова веќе не е џез, ова е латино музика“ и од тие причини, а не само од тие, решивме да започнеме една нова приказна во која на ‘музиката на светот’ ќе и’ дадеме нов термин и манифестација, таа приказна трае веќе 19 години, годинашното издание е 20-то по ред. На програмата на фестивалот продефилираа еден куп значајни артисти не само за таа ‘world music’ сцена, туку и многу пошироко, бидејќи таков е и концептот на фестивалот. Во овие изминати 19 изданија ги имавме најверојатно најголемите фадо имиња од Португалија, тука беа „Мадредеуш“, ја имавме Кармињо, Мариза…тие вообичаено доаѓаа на ОФФест или кога уште не беа популарни или беа на стартот на својот подем на кариерата, така што фестивалот одигра важна улога и на откривање на многу имиња, покрај оние познатите како Пети Смит, Spiritualized, Asian Dub Foundation, Tortoise, потоа имавме доста имиња од африканската сцена, практично се’ што е значано, беше Сеун Кути, истата година кога беа Gang of Four, се сеќавам на концертот, кога Енди Гил, кој неодамна почина, се сеќавам кога го виде Сеун Кути и рече: ‘Првпат го гледам, ова е фантастично’. Меѓу другото за тоа и служат фестивалите – музичарите да се дружат, и тие да откријат нешто ново, па можеби да се случи и некоја нова соработка“, вели за Утрински брифинг, Костадин Шурбановски, еден од организаторите на фестивалот.
ОФФест по вечерашните настани посветени на фадо музиката, фестивалот продолжува на 11 ноември продолжува кога во НОБ ќе настапат триото „Широм“ од Словенија, а по нив бразилски гитарист и композитор Кико Динучи. Последната фестивалската вечер, на 13 ноември, пак, ќе ја означи македонскиот реномиран музички уметник, фронтменот на групата Фолтин, Бранислав Николов со својот нов проект.
Повеќе видете во видеото.