Јакимовски: Со изградба на нов монтажен паркинг ќе се решава проблемот со паркирањето во клиничкиот центар

Заедно со министерството за здравство и Владата, Градски паркинг минатата година го изгради паркиралиштето пред Гинеколошко-акушерската клиника во Клиничкиот центар, со цел да се овозможи паркирање на поголем број возила, но граѓаните се уште имаат потреба од слободни паркин места. Тоа ќе се реши со изгадба на монтажна гаража, информираше денеска во Утрински брифинг директорот на ЈП Градски паркинг, Борче Јакимовски.

-Со реконструкцијата на овој паркинг се обезбедија нови 350 паркинг места, со што сега паркингот на Клинички центар располага со 1.050 паркинг места, од кои 1.500 се резервирани за вработените. За разлика од претходно сега има и улично паркирање. Во составот на монтажната ковид болница планираме да изградиме и монтажна гаража, со што паркинг просторот ќе го зголемиме за околу 300 места. Овој инвестициски зафат е внесен во програмата на Градот за 2021 година, така што до крајот на годината се очекува да биде реализиран, рече Јакимовски.

Тој нагласи дека во 2021 година не е предвидено поскапување на цените за паркирање, додека пак најави воведување на зонско паркирање во Карпош.