Јовановска: Реформите што ги правевме последните години – нашата упорност да ги исполниме условите ги стави лидерите пред свршен чин и мораа да ни дадат одлука за преговори
25 години ја чекаме одлуката на Европската унија. Реално, ние почнавме да аплицираме и ја утврдивме како наша стратешка цел евроинтеграцијата уште во 1995 година. Така што мислам дека веста за почетокот на преговорите е одлична и прекрасна сама по себе, вест што ја чекавме премногу и незаслужено долго.
Се надевам дека од сега натаму многу полесно ќе оди процесот без оглед на сите состојби во Унијата и без оглед на тоа што Македонија незаслужено се најде на опашката на сите овие процеси, изјави во Утрински брифинг, новинарката на Слободен печат, Слободанка Јовановска, говорејќи за последната одлука на европската комисија да даде зелено светло за започнување на преговори на Северна Македонија со ЕУ.
Вчера дури и се изненадив дека во време на епидемија, реално кога живееме во една вонредна состојба, многу луѓе на социјалните мрежи покажаа вистинска радост, упатуваа честитки. Тоа лично ме изненади оти сметам дека ние во Македонија сме научени генерално на лоши вести, вели Јовановска.
Говорејќи за пречките како реформите и спорот со Грција како кочничари за одлуката на ЕУ, Јовановска смета дека спорот за името била главна пречка и Македонија многу порано ќе добиела датум за преговори доколку ова порано се решело.
Реално ние треба да се погледнеме во себе и да се прашаме дали требаше толку долго да го решаваме спорот и да го издигнеме на такво ниво за практично да си ја уништиме евро-перспективата на државата. Мислам дека требаше многу порано да го решиме спорот.
Бевме жртви на комплексите на млада држава – дека премногу долго се занимававме со симболи, со национално достоинство, патриотизам и не можевме да застанеме прагматично и да оцениме кој е вистинскиот интерес на државата.
Изгубивме милијарди кои што можевме да ги инвестираме во развојот и денес Македонија да биде на повисоко рамниште во однос на стандардот, инфраструктурата…
Морам да напоменам и дека ова е многу тежок момент, кога внатре во Европа се силни струите кои заговараат дека Европа не треба да се шири, да се добие одлука за почеток на преговори. Мислам дека искрените и тешки реформи што ги правевме последните години и нашата реална упорност да ги исполниме уловите ги стави лидерите пред свршен чин и мораа да ни дадат ваква одлука.
Сметам дека во ЕУ нема расположение за проширување, но реалноста беше таква што на Македонија мораше да и се даде одлука за почеток на преговорите, изјави новинарката на Слободен печат, Слободанка Јовановска.