?? Богоевски: Избори што поскоро за функционални институции кои ќе го казнуваат непочитувањето на мерките за заштита

Избори треба што поскоро да се случат, со цел оформување на функционални институции кои ќе го санкционираат непочитувањето на мерките за заштита во борбата против Ковид 19, изјави поранешниот пратеник Павле Богоевски во денешното издание на Утрински брифинг.

Богоевски, кој по пратеничкиот мандат се префрли во Институтот за социјална демократија – Прогрес, смета дека мала група луѓе уште од самиот старт на кризата се однесува неодговорно.

„Сите ние ги живееме последиците од неодговорноста на мала група луѓе. Гледаме како полицискиот час не се почитува во одредени населени места, најчесто каде има потреба од најригорозна примена. Не се спречува непочитувањето. Ова ниво на непочитување не е ништо ново. Овој игнорантски однос и опасен однос на дел од јавноста постои од самиот почеток на кризата и расте паралелно со порастот на неказнивоста на таквото однесување“, вели Богоевски.

Тој причините ги наоѓа во немањето функционални институции, немањето датум за избори, кои вели, мора да се случат, и затоа партиите се во постојана кампања.

„Се работи за комбинација на премногу авторитативна позиција на религиските заедници итн. Имаме околности, да речеме ВМРО-ДПМНе на пример, преку својот министер во МВР, преку објавите во медиумите, прво пасивно а потоа и активно промовира непочитување на мерките за заштита. Кулминира со расшетувањето на Мицкоски во теретани и кафани спротивно на мерки и со отворените повици на Чулев да не се казнува непочитувањето на мерките. Од друга страна, целата влада и СДСМ не оддолеа на притисокот на верските заедници. Тоа не резултираше само со олабавување на полицискиот час туку и со целосно прекршување и непочитување на полицискиот час. Па така имавме во православната заедница литургии со лажички, а кај исламската заедница пак, имавме масовно убедување дека короната не постои за потоа да има наводен триумф над вирусот, пред самиот втор пик“, анализира Богоевски.

Поранешниот пратеник и активист очекува избори, бидејќи вели, мораме да имаме.

„Оваа совршена бура е сплет на околности, каде што немаме институции за контрола, кога ги нема народните претставници директно во пратеничките клупи…тоа не може да продолжи. Поради тоа немаме јасно дефинирана стратегија која се имплементира и имаме бркање поени кога би требало да имаме здружена активност. Тоа што во овој момент немаме Собрание е една од причините зошто треба да имаме избори. Колку повеќе чекаме и околностите кои ќе влијаат негативно врз вкупната економија и околностите со нов бран во септември, ќе бидат полоши“, изјави Богоевски во Утрински брифинг.