? Димитров: Бираме напред или назад, ја приближивме државата кон Европа колку што опозицијата ја имаше оттргнато

Ако успееме да ја издвоиме европската агенда од домашните дневно политички битки, пред нас може да бидат златни години. За тоа да се случи ќе треба елементарно разбирање во политичката комуникација и убедливиот пораз на 15 јули кој ќе и се случи на опозицијата, ќе биде чекор кон тоа, изјави во Утрински брифинг, носителот на листата на коалицијата „Можеме“ во изборната единица, Никола Димитров.

Димитров, одговараше на повеќе прашања, врзани пред се, со меѓународната позиција на Македонија, потоа како државата ќе ги регулира мерките на границите во пресрет на пандемијата со КОВИД 19, а меѓу другото и што за него значи партијата ВМРО-ДПМНЕ.

Во однос на границите, тој посочи дека нема простор за политика и калкулации во однос на пријателството, а одлуките за мерките на границите ќе се носат според епидемиолошката слика на земјите.

„Критериумот на ЕУ е под или близу 20 новозаразени на 100.000 жители на 14 дена. И секои 14 дена тоа ќе се ажурира. Некои земји одат поригорозно како Австрија или Италија. И надвор од блиските, пријателските односи, според проценките на епидемиолозите, ќе следат препораки кон Владата за мерките“, посочи Димитров.

Околу тоа зошто признавањето на македонскиот јазик доминира во кампањата на СДСМ за изборите, Димитров посочи дека тоа е важно од неколку аспекти:

„Последниот пат каде македонскиот јазик се јавува во документ на Европската комисија е 2005 година. Потоа имаме еден голем период каде македонскиот јазик најчесто се нарекува „државниот јазик“ а придавката „македонски“ се намалува. Тоа некаде во 2012 резултираше со непримање на извештајот, па почна малку да се појавува јазикот, меѓутоа македонскиот јазик е сега исклучително важен за нас како исчекор кон европските преговори, и се јавува како резултат на комплетирањето на личната карта на државата во ОН и тогаш правниците во Брисел донесоа упатство до сите инситуции во однос на користењето на јазикот. Се разбира дека е нормално и дека ни следува, но до таму дојдовме преку процесот за Преспанскиот договор, а подоцна тоа се рефлектира и во Европската комисија“, рече тој, додавајќи дека домашните политичари ќе треба да најдат начин да објаснат дека изразувањето на македонскиот идентите не може да биде ставен под знак прашање кога зборуваме за евроинтеграциите.

„Тоа е наша внатрешна работа, тоа е право на самоопределување и мислам дека со Бугарија, која многу ни помогна, да се отвори прашањето на европската интеграција, повторно процесот да влезе во агендите на земјите членки, да се поставиме јасно дека овде не смее да се чепка. Тоа нема да биде сосема едноставно, ќе бара вештина и мудрост и ќе заврши така како што треба да заврши“, изјави се уште актуелниот министер за надворешни работи.

Опозицијата пак, смета Никола Димитров, во целиот нивен мандат, македонскиот јазик го исчезна од документите на Европската комисија и тие немаат право да бараат маани.

„Референдумското прашање го реализиравме и на добар пат сме да го реализираме до крај. Уште тогаш во најава, над 600.000 граѓани гласа за. Тоа е политичко мнозинство кое кога би се добило на избори, некој би владеел со над 61 глас. Што ќе се случи со нашето знаме пред седиштето на НАТО? Можеби сакаат да го вратат ФИРОМ? Како ќе породолжат разговори со ЕУ? Ние каскавме назад, не поминаа сите држави од регионот, си имавме мака со македонскиот јазик, престанаа и да шепкаат за нас за НАТО и ЕУ… тоа е вистинската понижувачка позиција. Сето тоа е исправено, влеговме во НАТО, потврден е македонскиот јазик и очигледно почнуваме пристапни преговори со ЕУ. Значи има една крајна изгубенот од другата страна. Ние може ги викаме избори, но според понудите, бираме напред или назад“, дополни Димитров.

Тој е убеден во решителноста на Германија, во следното претседавање со Унијата дека ќе го продолжи процесот за евроинтеграција на Северна Македонија но затоа е потребна политичка влада во државата.