? Др. Митов со кампања „Никаде без маска“

На иницијатива на доктор Александар Митов, пред два дена започна кампања “Никаде без маска”. Идејата и целта на кампањата, како што вели тој е да се посвети внимание на опасноста од непочитување на мерките. – Идејата на кампањата е да покренеме една општествена енергија, колку што може повеќе луѓе да се вклучат во почитување на мерките за заштита од коронавирусот.

Во нашиот менталитет имаме навика, да бараме одговорност од други за последиците кои се резултат на нашето однесување. Тоа не треба да биде така. Справувањето со Ковид 19 е наша заедничка одговорност, а не само на здравствените власти. Бројките се загрижувачки и сега е момент да се “стегнеме” за да ја прекинеме заразата, вели др. Митов. Тој објаснува дека најголем акцент се става на маската, а не на другите мерки за заштита, од причина што со почитување на оваа мерка, ќе се намали драстично бројот на заболени.

Во историјата на човештвото, досега не се случило за толку голем медицински проблем, да постои толку едноставно решение. Решението на проблемот не е само во лекувањето, туку и во превенцијата. Во државите каде е задолжително носењето маски, бројот на новозаболени паѓа, и тоа за 25 проценти. Во државите каде не е задолжително носење маски, бројот на новозаболени порасна за 85 проценти, објаснува др. Митов. Тој вели дека е заблуда мислењето, дека маските се штетни.

Се појавија шпекулации дека носењето маска го зголемува количествтото на CO2 во организмот, но тоа не е точно. Замислете, хирурзите цел живот носат маски, и добро функционираат. Не се покажало покачување на CO2 кај тој што носи маска. Дополнително, имаше шпекулации, дали маските се хигиенски. Да, хигиенски се ако редовно се перат. Една студија вели дека ако 90 проценти од населението носи маски, бројките ќе се преполоват за 2-3 недели. Мислам дека затоа вреди да бидеме послушни и да носиме маски, вели др. Митов.