? Маја Чанкуловска: Заштитните марами со дела од збирката на Националната галерија станаа хит

Националната галерија на Република Северна Македонија изработи бандани, односно заштитни марами за лице со принт на уметнички дела, главно од врвни македонски сликари што предизвика огромен интерес кај публиката.

„Станува збор за бандани на коишто се аплицирани дела во сопственост на Националната галерија и таа акција се покажа исклучително успешна и популарна меѓу пбликата од различни генерации. Таа беше направена спонтано и објавена на социјалните мрежи. Банданите беа распродадени за само еден ден, а сега очекуваме втора тура. Една од најпопуларните марами е онаа со делото на Спасе Куновски „Грипозна ноќ“, на кое што е претставен човек со маска, што има симболично значење во контекст на актуелната ситуација со пандемијата.

Потоа има марами со дела од авторите кои се врвни имиња од македонската современа уметност како Душан Перчинков, Симон Шемов, Нове Франговски, Петар Мазев, коишт можат успешно да бидат графички прикажани“, рече Маја Чанкуловска, виш кустос во Националната галерија.

Таа информираше дека Националната галерија веќе ја објави својата програма до крајот на годината, која поради условите со пандемијата е во намален обем.