17-та по ред крводарителска акција во чест на Тоше Проески

По традиционален 17ти пат денеска во Домот на АРМ се одржува крводарителска акција посветена на легендарниот и непрежален пејач Тоше Проески, кој да беше жив, денес ќе наполнеше 40 години. 

-Во чест на Тоше, неговата хуманост и во чест на тоа што и тој самиот беше крводарител ја организираме традиционалната крводарителска акција која ќе се одвива во периодот од 9 до 17 часот.Оваа година ќе бидеме посебно внимателни поради ситуацијата со ковид-19, ќе ги почитуваме протоколите предвидени од Комисијата за заразни болести со цел да ги заштитиме даритлите, но и персоналот од Трансфузиона медицина и волонтерите од Црвениот крст, рече Александра Валкановска од црвениот крст на Град Скопје. И покрај тоа што во тект на годината се организираат и останати крводарителски акции, денешната акција која е посветена на Тоше Проески буди посебен интере кај граѓаните. На акцијата во негова чест најчесто доаѓаат млади луѓе до 35 годишна воздраст, а голем дел од нив се и дарители за прв пат. 

-Минатите години бројот на крводарители стигнуваше до 400, што е бројка за поздравување, или околу 4.200 дарители вкупно дарувале крв на изминатите 16 акции. На тој начин сметам дека и самите граѓани му оддаваат почит на Тоше, тој заслужува таков одзив на крводарители затоа што и самиот беше крводарител, вели Валкановска. Дарител може да биде секој кој има навршено 18 години, се чувствува во стабилна психо-физичка состојба, и доколку немал хируршки интервенции во изминатиот период.

Непосредно пред дарувањето кв се прави брза проценка на хемоглобин, како еден од условите за дарување. Доколку е се во ред, лицето може да пристапи кон чинот на дарување крв. Жените можат три пари годишно да даруваат крв, додека мажите имаат можност тоа да го прават четири пати годишно. Примерот на Тоше го следат и останатите негови колеги и луѓе од естрадата и јавниот живот.