Иран нуди соработка во истрагата за уривањето на авионот, Трамп добива ограничување од Конгресот за воена интервенција

Иран ќе дозволи на САД и авионската компанија Боинг да помогнат во истрагата на падот на украинскиот авион кој завчера се урна непосредно по полетувањето од Техеран кон Киев. И покрај демантот дека Иран стои зад уривањето на авионот, Канада, САД и Британија соопштија дека според разузнавачки информации иранска ракета земја-воздух го погодила патничкиот авион, вели за Утрински брифинг на „Слободен печат“ новинарот Дејан Андоновиќ.

Сепак како што соопштија челниците на овие три држави Трудо, Трамп и Џонсон, најверојатно се работи за случајна грешка и ненамерно погодување на патничкиот воздухоплов. И покрај првичното демантирање и негирање Техеран сепак се согласи да соработува со цел да се дознае вистината за трагичниот инцидент на патничкиот авион во кој загинаа 170 патници. Ова само укажува дека тензиите се намалуваат и дека Техеран е подготвен да ја намали тензијата и воената реторика.

Како дополнување дека веројатно заканите од поголеми воени операции во Персискиот залив се сведени на минимум доаѓа и од американскиот Конгрес кој утринава изгласа ограничување на воените ингеренции на претседателот Доналд Трамп. Гласањето е резултат на нападот со беспилотното летало и убиството на иранскиот генерал Касим Сулејмани, што предизвика тензија и реакција на Иран.

Во изгласаното ограничување се предвидува претседателот Трамп да не може да започне војна против други држави без одобрување и дебата во Конгресот. Тој според оваа резолуција ќе има право да донесува одлуки само доколку се работи за загрозена безбедност и одбрана на територијата на САД.

Со оваа одлука практично се одзема правото американскиот претседател Трамп самостојно да донесува ваков тип одлуки за изведување на воени интервенции врз трети земји со што и официјално заканата од нова војна во Персискиот залив е сведена на минимум.