Македонските потрошувачи главно се водат по цените во маркетите

Трета година по ред, истражувањето на агенцијата Инсајдер ИТ, за преференциите на граѓаните за користење на услугите на маркетите во државата, покажуваат дека КАМ е на врвот, Тинекс на второ, Стокомак на трето место.

Сергеј Зафировски, менаџер на Инсајдер ИТ, во „Утрински брифинг“ рече дека во Македонија потрошувачите главно при пазарењето се водат по својот буџет, а дисконтите можат да си дозволат да ги оптимизираат своите цени со тоа што пак им се осврнуваат на сите потрошувачи.  

„Во Македонија и во Европа цената е првиот одреденик на посетата на маркетот. Цените, локацијата и паркингот се меѓу главните предуслови на купувачите“, вели Зафировски.

Анализите покажале дека КАМ и Стокомак според начинот на работа ги таргетираат сите можни потрошувачи, додека маркетите од типот на Веро, Тинекс, Рамстор таргетираат одредени потрошувачи кои се трудат да ги задржат во континуитет.

Помеѓу условите по кои се водат потрошувачите исто голема улога играат и услугите кои ги нудат маркетите, па затоа европскиот тренд, кој Зафировски вели е присутен и во Македонија, покажува раст, односно дека во иднина освен пиљари и пекари, маркетите ќе имаат и збогатени понуди во трка за нови потрошувачи.