?Кнежевиќ Гајдаѕис: Меѓународен ден на семејството – Родителската улога е најблагородната и едновремено најсложената и најодговорната животна улога

Денеска во светот се одбележува 15 мај, Меѓународниот ден на семејството. 15 мај за меѓународен ден на семејството е прогласен од страна на Обединетите нации во 1993 година, а првпат е одбележан во 1994 година.

Со Меѓународниот ден на семејството се истакнува значењето на семејството на меѓународен план

Гостин во Утрински брифинг беше Д-р Славица Кнежевиќ Гајдаѕис од Институт за брак, семејство и системска пракса – Алтернатива.

-На сите оние кои доаѓаат, сакавме да понудиме алтернативна институција во која работи тим од едуцирани, стручни, посветени, професионални лица, кои пред се морат да бидат добри луѓе, посветени на својата хумана мисија, отворени и внимателни за се она што се случува во душата и животот на човекот кој доаѓа барајќи совет, помош. Сакавме да понудиме алтернативна атмосфера, професионална и дискретна, во која стручната помош ќе ги води кон пронаоѓање на најдоброто можно решение за секојдневните и помалку секојдневни проблеми во индивидуалното и семејно живеење, во професијата, во партнерските и/или брачни релации и оние во поширокото социјално опкружување.

Сакавме да создадеме алтернативна можност и пријатна атмосфера за организирано учење и стекнување на вештини за справување со кризата и стресот, за сопствениот раст и развиток, за изборот на професијата и разрешувањето на професионалните проблеми, за градењето и одржување на партнерската врска и/или функционалните брачни релации, за предизвиците на родителската улога, за детските, а особено адолесцентните теми и дилеми, за создавање на хармонична семејна атмосфера.

Родителската улога е најблагородната и едновремено најсложената и најодговорната животна улога. Родителствувањето не преполнува со љубов, радост, среќа, задоволство, очекувања, надежи, стремежи и едновремено не преплавува со тешкотии, страв и грижи. Не воздигнува и во следниот момент ни создава недоумици, дилеми, не прави несигурни и непредвидливи. Имаме свои принципи и правила, но тешко ги спроведуваме, ранливи сме и попустливи. Толку сакаме и се обидуваме да бидеме безгрешни, а така често правиме мали и не така мали грешки. Потоа се каеме, несреќни сме и така во круг.

Состојбата е уште посложена кога како родителски пар взаемно не се разбираме, не се почитуваме, се навредуваме, се разидуваме во своите родителски правила и очекувања и се дисквалификуваме,. Наликуваме на “раштимуван оркестар”, а нашето богатство, нашето дете сакаме да развие добар слух, т.е. да не слуша.

-Програмата за родителство има за цел да им помогне на родителите да научат нови вештини за:

– справување со чувствата и однесувањето на детето

– воспоставување на правила во домот

– подобрување на односот родител-дете

– разрешување конфликти

– учење на ефикасни начини за одржување дисциплина преку позитивни родителски практики

– стекнување поголема самодоверба како родител