Нефрон: трансплантацијата од починат донор се уште е „тргни-застани“

Вкупната светска популација на пациенти кои се со некаква бубрежна слабост изнесува околу десет проценти. Таков е процентот и кај нас. што значи дека голем број граѓани имаат проблеми со бубрезите. Ова денеска во Утрински брифинг го истакна претседателот на здружението на бубрежно болни, „Нефрон“, Душко Ѓорѓиев.

-Околу 200.000 граѓани во Македонија имаат некаква бубрежна слабост, но многу помал број е бројот на пациенти кои завршуваат на дијализа, од 1400 до 1600 пациенти. Во земјава има 23 центри за дијализа распоредени низ целата територија, што овозмможува секој пациент да добие дијализа во местото каде што живее. Состојбата со центрите за дијализа посебно се подобри откако се воведе концесионерство во дијализните центри, објаснува Ѓорѓиев. Дијализата би требало да биде само привремена состојба, пред да се изврши трансплантација на бубрег, но во Македонија тоа е процес кој понекогаш се одвива и доживотно.

-Тековно се одвива трансплантацијата која е од сроден донор, односно од член на семејството. Но, трансплантацијата од починат донор се уште е „тргни-застани“. Некогаш се случува годишно да се направат и по 15 трансплантации, но некогаш се случува да нема ниту една. Минатата година имаше 12 трансплантации од кои 8 беа од познат дарител, а само четири беа од кадавер, а оваа година до сега немаме ниту една од кадавер и само пет од познат дарител.

Трансплантацијата е сложен процес од многу чинители и доколку нешто не функционира не може да се одвива. Треба да има систем во кој луѓето ќе работат исклучиво на таа проблематика. Исто така потребна е национална кампања за дарување на органи, објаснува Ѓорѓиев.