Прва Станковиќ прави и подарува маски бесплатно: Не е време за профитирање, само да запре болеста

Прва Станковиќ, 79 години, од неготинското село Пепелиште, која 22 години работела како хигиеничар во неготинската болница, во Утрински брифинг денеска раскажа од каде нејзината инспирација за шиење и подарување маски бесплатно кон секој кој што ќе тропне на нејзината врата. „Луѓе се пожалија дека или не можат да најдат да купат заштитни маски или имало, но биле скапи.

Така решив да сошијам и да подарам по некоја маска. Тие што немаат, доаѓаат до мојот двор, им давам. Имам направено преку 150 до сега. Пари не земам, важно е да не се шири болеста. Имам во различни форми. Маските се платнени и можат да се перат“, вели Станковиќ. Таа потенцира дека сега не е време за профитирање и дека ќе продолжи да шие додека има материјал.